“பக்தியின் பெயரால் இப்படியொரு கொடுமையா…?! ஒரே ஒரு வீடியோ… பற்றி எரியும் இணையதளம்… ஜூனாகத்தில் நடந்தது என்ன..?!”

குஜராத்தின் ஜூனாகத் பகுதியில் உள்ள புனிதப் பயணப் பாதையில், நான்கு நபர்கள் ஒரு பக்தரைப் பல்லக்கில் சுமந்து கொண்டு செங்குத்தான படிகளில் மேலே ஏறிச் செல்லும் காணொளி ஒன்று சமூக வலைதளங்களில் வைரலாகி வருகிறது. இக்காணொளி பரவியதைத் தொடர்ந்து, சக மனிதர்களை மனிதர்களே சுமந்து செல்லும் இத்தகைய நடைமுறை பக்தியின் வெளிப்பாடா அல்லது மனித உழைப்புச் சுரண்டலா என்ற விவாதம் இணையவாசிகளிடையே தீவிரமடைந்துள்ளது.

இந்த வீடியோவை விமர்சிப்பவர்கள், “மனிதர்களை மனிதர்கள் சுமப்பது நவீன சமூகத்தின் சமத்துவத்திற்கும் மனித கண்ணியத்திற்கும் எதிரானது” எனக் கருத்து தெரிவித்து வருகின்றனர். வயதானவர்கள் மற்றும் உடல்நலக் குறைபாடு உள்ளவர்களுக்கு இது உதவியாக இருந்தாலும், கேபிள் கார் போன்ற நவீன போக்குவரத்து வசதிகள் உள்ள இடங்களில் கூட மனிதர்களைப் பல்லக்கில் சுமப்பதை வேலைவாய்ப்பு என்ற பெயரில் நியாயப்படுத்த முடியாது என்று பலரும் ஆதங்கம் தெரிவித்துள்ளனர்.

அதேவேளையில், மற்றொரு தரப்பினர் இந்த நடைமுறைக்கு ஆதரவாகப் பேசி வருகின்றனர். இது அப்பகுதியில் உள்ள தொழிலாளர்களின் குடும்ப வாழ்வாதாரத்திற்கு மிக முக்கியமான வருமான ஆதாரமாக விளங்குவதாகவும், மலையேற முடியாத முதியவர்கள் மற்றும் மாற்றுத்திறனாளி பக்தர்களுக்கு இது ஒரு இன்றியமையாத சேவையாக இருக்கிறது என்றும் அவர்கள் சுட்டிக்காட்டுகின்றனர். இதனால் வாழ்வாதாரம், பாரம்பரியம் மற்றும் மனித உரிமை சார்ந்த இருவேறு கருத்துக்களால் இணையதளம் பிளவுபட்டுள்ளது.