“எனக்கு பணம் வேண்டாம்… மன அமைதி போதும்..!” 5 வருஷத்துக்குச் சேமிப்பு இருந்தும்.. ₹900 சம்பளத்தில் பாத்திரம் கழுவும் கார்ப்பரேட் இளைஞர்..! வைரலாகும் ரெடிட் பதிவு…!!

கார்ப்பரேட் நிறுவனத்தில் பணிநீக்கம் செய்யப்பட்டதைத் தொடர்ந்து, 29 வயதான இளைஞர் ஒருவர் உணவகம் ஒன்றில் பாத்திரம் கழுவும் பகுதிநேர வேலையில் சேர முடிவெடுத்துள்ளார். கார்ப்பரேட் வேலை பறிபோனது வருமானத்தைப் பாதிப்பது மட்டுமின்றி, மனிதனின் மனநிலையையும் கடுமையாகப் பாதிக்கக்கூடும் என்பதற்கு Reddit தளத்தில் பகிரப்பட்ட இச்சம்பவம் ஒரு சுவாரஸ்யமான உதாரணமாகும். கடந்த ஏப்ரல் மாதத்தில் வேலையை இழந்த இந்த இளைஞருக்கு, முந்தைய நிறுவனத்தில் இருந்து 9 மாத பணிநீக்க நிவாரணத் தொகையும் மற்றும் நவம்பர் மாதம் வரை வேலையில்லா கால உதவித்தொகையும் கிடைத்து வருகிறது. மேலும், அவரிடம் சுமார் 5 ஆண்டுகள் வரை வேலையின்றி சமாளிக்கும் அளவுக்கு அவசரகால சேமிப்பு நிதி உள்ளது. இருப்பினும், பண நெருக்கடிக்காக அல்லாமல், மன அமைதிக்காகவும் ஒரு தினசரி வேலை நேரத்தை உருவாக்கவுமே இவர் மணி நேரத்திற்கு 11 டாலர் சம்பளத்தில் பாத்திரம் கழுவும் வேலையைத் தேர்ந்தெடுத்துள்ளார்.

கார்ப்பரேட் வேலை கை நழுவிய பிறகு, அவர் 200-க்கும் மேற்பட்ட நிறுவனங்களுக்கு விண்ணப்பித்து 15-க்கும் அதிகமான நேர்காணல்களில் பங்கேற்றபோதிலும் எந்தப் பலனும் கிடைக்கவில்லை. சுமார் 4 மாதங்களாக வீட்டிலேயே முடங்கியிருந்தது அவரது அன்றாட வாழ்க்கையையும் மனநலனையும் மெல்லப் பாதிக்கத் தொடங்கியது. காலையில் எழுவது, நாள் முழுவதும் வீட்டில் சும்மா இருப்பது, மீண்டும் அதையே தொடர்வது என எந்தவொரு குறிப்பிட்ட கால அட்டவணையும் இல்லாததால், தான் எதற்குமே லாயக்கற்றவன் போன்ற உணர்வு அவருக்கு ஏற்பட்டது. இந்த மன உளைச்சலில் இருந்தும், இடைவிடாத சிந்தனைகளில் இருந்தும் விடுபடவே அவர் உணவகத்தில் பகுதிநேரப் பணியில் இணைய முடிவெடுத்தார். நாளில் சில மணிநேரங்கள் வேலையில் செலவழிக்கும்போது மனது பிஸியாக இருப்பதோடு, பயனுள்ள ஒரு காரியத்தைச் செய்வதாக உணர்ந்து அமைதி பெற முடியும் என்பதே அவரின் நோக்கமாகும்.

Reddit தளத்தில் ‘mangodrives’ என்ற பயனரால் பகிரப்பட்ட இந்த அனுபவம், ஓய்வுக்காலத்திற்கும் மனித உழைப்பிற்கும் இடையே உள்ள பிணைப்பைக் குறித்துச் சிந்திக்க வைத்துள்ளது. சுமார் 30 ஆண்டுகள் கார்ப்பரேட் துறையில் பணியாற்றி, இன்னும் 3 ஆண்டுகளில் ஓய்வு பெறவுள்ள தன் தந்தையைக் குறிப்பிட்டுள்ள அந்த இளைஞர், அன்றாட பிஸியான வாழ்க்கை திடீரென நின்றுபோனால் தன் தந்தைக்கும் இத்தகைய வெற்று உணர்வு ஏற்படக்கூடும் என்று கவலை தெரிவித்துள்ளார். நிதிநிலைமை சிறப்பாக இருந்தாலும் கூட, ஒரு மனிதனுக்கு மனரீதியாக சுறுசுறுப்பாக இருக்கவும், அன்றாட வாழ்க்கைக்கு ஒரு குறிப்பிட்ட நோக்கம் இருக்கவும் வேலை அவசியமாகிறது என்பதை இச்சம்பவம் உணர்த்துகிறது. வேலை என்பது வெறும் சம்பளத்திற்கான ஆதாரம் மட்டுமல்ல, அது நமது தினசரி வாழ்க்கைமுறை, அடையாளம் மற்றும் மனச்சமநிலையின் முக்கிய அங்கமாகவும் திகழ்கிறது.