“அன்று எங்கள் முதலமைச்சரை கேள்வி கேட்டீங்களே.. இன்று என்னாச்சு..?” CM விஜய்யின் மெளனத்தை கிழித்துத் தொங்கவிட்ட திமுக பரந்தாமன்..!!

திமுக சட்டத்துறை இணைச் செயலாளர் ஐ. பரந்தாமன், தமிழக வெற்றிக் கழகத்தின் முக்கிய நிர்வாகிகள் அடுத்தடுத்து பல்வேறு குற்றச் சம்பவங்களில் சிக்கி வருவது குறித்தும், அதுகுறித்து முதலமைச்சர் சி. ஜோசப் விஜய் மௌனம் காப்பது குறித்தும் மிகக் காரசாரமான கேள்விகளை எழுப்பியுள்ளார். நாகப்பட்டினத்தில் தவெக நிர்வாகி பூபாலன் 135 கிலோ மெத்தப்பெட்டமைன் போதைப்பொருள் கடத்தல் வழக்கில் கைதான விவகாரத்தை முன்வைத்துச் செய்தியாளர்களிடம் பேசிய அவர், தவெக ஆட்சியில் அக்கட்சியின் நிர்வாகிகளே தொடர்ச்சியாகப் போதைப்பொருள் மாஃபியா மற்றும் பத்திரிகையாளர் மிரட்டல் போன்ற தீவிரமான சட்டவிரோதச் செயல்களில் ஈடுபட்டு வருவதாகக் குற்றம் சாட்டினார். தன் சொந்தக் கட்சி நிர்வாகிகள் இத்தகைய தேச விரோத, சமூக விரோதக் குற்றச் செயல்களில் நேரடியாகத் தொடர்பு கொண்டிருக்கும்போது, மாநிலத்தின் முதலமைச்சராக இருக்கும் விஜய் எவ்வித எதிர்வினையும் ஆற்றாமல் அமைதி காப்பது ஏன் என்று பரந்தாமன் கேள்வி எழுப்பியுள்ளார்.

முன்னதாக எதிர்க்கட்சியாக இருந்தபோது திமுக தலைமையையும், அப்போதைய முதலமைச்சரையும் பல்வேறு விவகாரங்களுக்காகக் கேள்வி கேட்டு விமர்சித்த தவெக தலைமை, இப்போது தன் சொந்தக் கட்சியே குற்றவாளிகளின் கூடாரமாக மாறிக்கொண்டிருக்கும் வேளையில் வாய் திறக்க மறுப்பது ஏன் என்று அவர் சாடியுள்ளார். “எங்கள் முதலமைச்சரை அன்று அடுக்கடுக்கான கேள்விகள் கேட்டீர்களே.. இப்போது உங்கள் கட்சியின் முக்கியப் பொறுப்பாளர்கள் சர்வதேச அளவில் போதைப்பொருள் கடத்தலில் கைதாகும்போது ஏன் இந்த மெளனம்? இப்ப ஏன் வாய் திறக்க மறுக்கிறீர்கள் CM?” எனச் சுட்டிக்காட்டியுள்ள பரந்தாமன், தவெக அரசுக்கு இத்தகைய குற்றவாளிகளிடம் இருந்துதான் நிதி வருகிறது என்றும், இது ‘தமிழக வெற்றிக் கழகமா’ அல்லது ‘டிரக்ஸ் வெற்றிக் கழகமா’ என்று மக்கள் மத்தியில் சந்தேகம் எழுந்துள்ளதாகவும் தனது கடுமையான கண்டனத்தை வெளிப்படுத்தியுள்ளார்.