“என்னால NEET பாஸ் பண்ண முடியாது.. என்னை மன்னிச்சிடுங்க” தந்தையின் துப்பாக்கியால் சுட்டு 18 வயது மாணவி பகீர் தற்கொலை.. சிக்கிய உருக்கமான கடிதம்..!!

உத்தரப் பிரதேச மாநிலம் பிரயாக்ராஜில் நீட் தேர்வில் தேர்ச்சி பெற முடியாத மன உளைச்சலால் 18 வயது மாணவி ஒருவர், தனது தந்தையின் உரிமம் பெற்ற துப்பாக்கியால் சுட்டு தற்கொலை செய்து கொண்ட அதிர்ச்சிச் சம்பவம் நிகழ்ந்துள்ளது. பிரயாக்ராஜின் ஜுன்சி காவல் நிலைய எல்லைக்குட்பட்ட திரிவேணிபுரம் பகுதியைச் சேர்ந்த அந்த மாணவி, கடந்த முறை நீட் தேர்வில் தோல்வியடைந்ததைத் தொடர்ந்து, அடுத்த கட்டத் தேர்விற்குத் தீவிரமாகத் தயாராகி வந்துள்ளார்.

மாணவியின் குடும்பத்தினர் அளித்த தகவலின்படி, அவர் தினமும் அதிகாலை 4 முதல் 5 மணி வரை விழித்திருந்து படித்துவிட்டு, மதியம் 2:30 மணியளவில்தான் தூங்கி எழுவதை வழக்கமாகக் கொண்டிருந்தார். திங்கட்கிழமை மதியம் 3 மணி கடந்தும் அவர் அறையிலிருந்து வெளியே வராததால் சந்தேகமடைந்த குடும்பத்தினர் உள்ளே சென்று பார்த்தபோது, அவர் துப்பாக்கியால் சுட்டு தற்கொலை செய்து கொண்டது தெரியவந்தது. சம்பவ இடத்திலிருந்து மீட்கப்பட்ட தற்கொலைக் குறிப்பில், “என்னால் ஒருபோதும் நீட் தேர்வில் தேர்ச்சி பெற முடியாது. என்னை மன்னித்து விடுங்கள்” என்று அந்த மாணவி உருக்கமாக எழுதியுள்ளார்.

உயிரிழந்த மாணவியின் தந்தை இந்திய தேசிய நெடுஞ்சாலை ஆணையத்தில் (NHAI) ஓய்வு பெற்ற பொறியாளராகப் பணியாற்றியவர் என்று காவல்துறை தரப்பில் தெரிவிக்கப்பட்டுள்ளது. தற்போது மாணவியின் உடல் பிரேதப் பரிசோதனைக்காக அனுப்பப்பட்டு, இச்சம்பவம் குறித்து போலீசார் அடுத்தகட்ட சட்டபூர்வ விசாரணைகளை மேற்கொண்டு வருகின்றனர். தேர்வு அழுத்தத்தால் இளம் மாணவி ஒருவர் எடுத்துள்ள இந்தத் துயர முடிவு மாணவர்களிடையேயான கல்வி மன அழுத்தத்தை மீண்டும் வெளிச்சத்திற்கு கொண்டு வந்துள்ளது.