“ஆண் குழந்தை பிறக்கலைனு மனைவி கொலை” பெத்த தாயும் இல்ல.. தடி எடுத்த தந்தையும் இல்ல… கலங்கி நின்ற 7 வயது சிறுமிக்கு கைகொடுத்த காவல்துறை.. பாராட்டும் இணையவாசிகள்..!!!

தெலுங்கானா மாநிலம் கரீம்நகரில், ஆண் குழந்தை பிறக்கவில்லை என்ற காரணத்திற்காக மனைவியைக் கொலை செய்த கணவன் கைது செய்யப்பட்டதை அடுத்து, திக்கற்ற நிலையில் நின்ற 7 வயது சிறுமிக்கு காவல்துறையினர் கைகொடுத்துள்ளனர். கடந்த அக்டோபர் 25ஆம் தேதி, தாவூ சந்திரகுமார் என்ற நபர் தனது மனைவியைக் கொடூரமாகக் கொலை செய்தார். இந்தத் துயரச் சம்பவத்தைத் தொடர்ந்து தலைமறைவாக இருந்த சந்திரகுமாரைக் காவல்துறையினர் கைது செய்து சிறையில் அடைத்தனர்.

பெற்ற தாயின் மரணம், தந்தை சிறைக்குச் சென்றது என ஒரே நேரத்தில் இருவரையும் இழந்து அந்த 7 வயது சிறுமி ஆதரவற்ற நிலைக்குத் தள்ளப்பட்டாள். சிறுமியின் தாத்தா கடுமையான உடல்நலக் குறைவால் பாதிக்கப்பட்டு அவதிப்பட்டு வந்ததால், அவரால் அந்தச் சிறுமியைப் பராமரிக்கவோ அல்லது அவளது அன்றாடத் தேவைகளைக் கவனிக்கவோ முடியாத இக்கட்டான சூழல் நிலவியது. இதனால், அந்தச் சிறுமியின் எதிர்காலம் என்ன என்ற பெரும் கேள்விக்குறி எழுந்தது.

இந்த இக்கட்டான சூழ்நிலையில், மனிதாபிமானத்தோடு செயல்பட்ட காவல்துறையினர் அந்தச் சிறுமிக்குத் துணையாக நின்றனர். உடல்நலமில்லாத தாத்தாவின் முன்னிலையிலேயே, சிறுமியின் பாதுகாப்பான எதிர்காலத்தை உறுதி செய்யும் வகையில், அவளைக் குழந்தைகள் நலக் குழுவிடம் போலீசார் முறைப்படி ஒப்படைத்தனர். நெஞ்சை உலுக்கும் இந்தச் சம்பவத்தில் தவித்த குழந்தைக்குக் காவல்துறையினர் புகலிடம் தேடித்தந்தது அப்பகுதி மக்களிடையே நெகிழ்ச்சியை ஏற்படுத்தியுள்ளது.