யாரு சாமி நீங்க..! போலீஸ் கஸ்டடியிலும் செம ஹேப்பி… இணையத்தைக் கலக்கும் 2 மதுக்கடத்தல்காரர்களின் ‘ஸ்மைலிங்’ போட்டோ..!!

ஜம்மு-காஷ்மீரின் அனந்தநாக் பகுதியில் காவல்துறை நடத்திய சோதனையின் போது பிடிபட்ட இரண்டு மதுபானக் கடத்தல்காரர்களின் புகைப்படங்கள் சமூக வலைதளங்களில் வைரலாகி வருகின்றன. காவல்துறையினரின் சோதனையின் போது, 21 மது பாட்டில்களுடன் பிடிபட்ட இந்த இருவர் மீதும் அபகரிப்பு மற்றும் கலால் சட்டப் பிரிவுகளின் கீழ் வழக்குப்பதிவு செய்யப்பட்டது. வழக்கமாகப் போலீஸ் பிடியில் சிக்கியவர்கள் அச்சத்தில் இருக்கும் நிலையில், இவர்கள் இருவரும் கஸ்டடியில் புன்னகையுடன் போஸ் கொடுத்த புகைப்படங்கள் இணையவாசிகளின் கவனத்தை ஈர்த்துள்ளன.

காவல்துறையினர் பறிமுதல் செய்யப்பட்ட 21 மது பாட்டில்களை மேஜை மீது வைத்து, அதற்குப் பின்னால் குற்றம் சாட்டப்பட்ட இருவரையும் நிற்க வைத்துப் புகைப்படம் எடுத்தனர். அந்தப் புகைப்படத்தில் இருவரது முகத்திலும் புன்னகை தவழ்ந்தது. வழக்கு பதிவு செய்யப்பட்ட விவரங்கள் அடங்கிய ஏ4 காகிதத்தைப் பிடித்தபடி இவர்கள் சிரித்துக் கொண்டிருக்கும் காட்சியை அனந்தநாக் காவல்துறை சமூக வலைதளங்களில் பகிர்ந்து கொண்டது. இந்தத் தோற்றம் நெட்டிசன்களை ஆச்சரியத்திலும் சிரிப்பிலும் ஆழ்த்தியது.

இந்த விசித்திரமான புகைப்படத்தைப் பார்த்த இணையவாசிகள் பலவிதமான வேடிக்கையான கருத்துகளைத் தெரிவித்து வருகின்றனர். சிலர் “இது மகிழ்ச்சியால் வந்த கண்ணீரைப் போல, சோகத்தால் வந்த சிரிப்போ?” என்றும், வேறு சிலர் “இவர்களுக்குப் போலீஸ் கஸ்டடியில் போதை தெளிந்துவிட்டதா அல்லது போதை பரிசோதனை செய்ய வேண்டுமா?” என்றும் கேள்வி எழுப்பியுள்ளனர். ஜம்மு-காஷ்மீர் கலால் சட்டத்தின்படி இவர்களுக்கு அபராதமும் 3 ஆண்டுகள் வரை சிறைத்தண்டனையும் கிடைக்க வாய்ப்புள்ள நிலையில், இவர்களது இந்தப் புன்னகை புகைப்படம் வைரலாகி வருகிறது.