“மீரட் ‘ப்ளூ டிரம்’ கொலையை மிஞ்சிய ‘பெட்டி’ சம்பவம்.. போர்வையால் சுற்றிக் கிடந்த கணவன் சடலம்.. ரூ.1,200-க்கு லோடர் வண்டி புக் செய்த மனைவியின் பகீர் பின்னணி..!!

மீரட்டில் பரபரப்பை ஏற்படுத்திய ‘ப்ளூ டிரம்’ கொலைச் சம்பவத்தைத் தொடர்ந்து, உன்னாவோவில் நெடுஞ்சாலை ஓரத்தில் இரும்புப் பெட்டிக்குள் இளைஞரின் சடலம் கண்டெடுக்கப்பட்ட ‘பெட்டிச் சம்பவம்’ அப்பகுதியில் பெரும் பரபரப்பை ஏற்படுத்தியுள்ளது. செவ்வாய்க்கிழமை இரவு, ரேபரேலி-உன்னாவ் நெடுஞ்சாலையில் உள்ள சுகாதார மருத்துவமனைக்கு அருகில் சாலையோரத்தில் ஒரு பெட்டி கிடப்பதாகக் காவல்துறைக்குத் தகவல் கிடைத்தது. சம்பவ இடத்திற்கு விரைந்து வந்த போலீசார், பெட்டியைத் திறந்தபோது போர்வைகள் மற்றும் துணிகளால் சுற்றப்பட்ட நிலையில் சோனு என்ற இளைஞரின் சடலம் உள்ளே கண்டெடுக்கப்பட்டது. சம்பவத்தின் தீவிரத்தைக் கருத்தில் கொண்டு மூத்த காவல்துறை அதிகாரிகள் விசாரணையை முடுக்கிவிட்டனர்.

இந்தக் கொடூரக் கொலை வழக்கை விரைவாகத் தீர்ப்பதற்காகக் காவல் கண்காணிப்பாளர் ஜெய்பிரகாஷ் சிங் தலைமையில் ஐந்து விசாரணைக் குழுக்கள் அமைக்கப்பட்டன. சம்பவப் பகுதியில் உள்ள சிசிடிவி மற்றும் வாகன எண்களைக் கண்டறியும் என்பிஆர் கேமராக்களை ஆய்வு செய்தபோது, ஒரு சுமை ஏற்றும் வாகனம் சந்தேகத்திற்கிடமான முறையில் சென்றது கண்டறியப்பட்டது. அதன் உரிமையாளர் ராஜேஷ் குப்தாவிடம் விசாரித்தபோது, கங்காகாட் கஞ்சன் நகரைச் சேர்ந்த நேஹா ராவத் என்பவர் வீட்டுப் பொருட்களை ஏற்றிச் செல்ல ரூ.1,200-க்கு அந்த வாகனத்தை முன்பதிவு செய்தது அம்பலமானது. இந்தத் தடயத்தின் அடிப்படையில் சோனுவின் மனைவி நேஹாவைப் போலீசார் அதிரடியாகக் கைது செய்தனர்.

காவல்துறை விசாரணையில், மதுவுக்கு அடிமையான சோனு அடிக்கடி தனது மனைவி நேஹாவைத் தாக்கி வந்துள்ளார். இதனால் ஏற்பட்ட தகராறில், அண்டை வீட்டுக்காரரான ராகுல் என்பவர் சோனுவுக்கு அதிகப்படியான மதுவைக் கொடுத்து வீட்டிற்கு அனுப்பியுள்ளார். வீட்டிற்கு வந்து சோனு தகராறு செய்தபோது, நேஹா அவரது தலையில் மசாலா அரைக்கும் கல்லால் தாக்கியுள்ளார். சோனு தரையில் விழுந்ததும், ராகுல் அவரது முகத்தைப் போர்வையால் மூடி மூச்சுத்திணறடித்துக் கொலை செய்துள்ளார். பின்னர், நேஹா, ராகுல் மற்றும் தவ்ஹீத் ஆகிய மூவரும் சேர்ந்து சடலத்தை இரும்புப் பெட்டிக்குள் பூட்டி, லோடர் வாகனம் மூலம் நெடுஞ்சாலையில் வீசியுள்ளனர். சிசிடிவி உதவியுடன் 12 மணி நேரத்திற்குள் இந்த வழக்கைத் தீர்த்த காவல்துறை குழுவிற்கு ரூ.20,000 ரொக்கப் பரிசு அறிவிக்கப்பட்டுள்ளது.