“அண்ணா என்னை வீட்டுக்குக் கூட்டிட்டு போங்க, சாப்பாடு தர மாட்டேங்குறாங்க..” 8 வயது சிறுவனின் கண்ணீர் ஓலம்.. வீடியோவைப் பார்த்து உறைந்த நெட்டிசன்கள்..!!

ஆந்திர மாநிலம் ராசவாரிபாலம் அருகே நரவாடா கிராமத்தைச் சேர்ந்த ராமய்யா என்ற 8 வயது சிறுவன், ஆடுகளை மேய்க்கும் கட்டாயப் பணியில் ஈடுபடுத்தப்பட்ட கொடூரமான சம்பவம் வெளிச்சத்திற்கு வந்துள்ளது. அந்தப் பகுதியில் இருந்தவர்களிடம், “அண்ணா என்னை என் வீட்டிற்கு அழைத்துச் செல்லுங்கள், அவர்கள் எனக்குச் சரியாகக் கூட உணவு தருவதில்லை; என்னால் சரியாக நடமாடக் கூட முடியவில்லை” என்று அந்தச் சிறுவன் அழுதுகொண்டே தன் குமுறலை வெளிப்படுத்திய நெஞ்சை உலுக்கும் வீடியோ சமூக வலைதளங்களில் வைரலாகி வருகிறது. இத்தனை சிறிய வயதில் ஒரு குழந்தையைக் கட்டாய உழைப்பில் ஈடுபடுத்தி, பசியால் வாட வைப்பது கடுமையான சட்டக் குற்றமாகும்.

பாதிக்கப்பட்ட இந்தச் சிறுவனுக்கு உடனடியாக நீதி கிடைக்க வேண்டும் என்று ஆந்திர மாநில அமைச்சர் நாரா லோகேஷ், ஆந்திரப் பிரதேச காவல்துறை மற்றும் குழந்தைகள் நலத்துறை அதிகாரிகளுக்குச் சமூக வலைதளங்கள் மூலம் அவசரக் கோரிக்கை விடுக்கப்பட்டுள்ளது. அதிகாரிகள் உடனடியாக இந்த இடத்திற்குச் சென்று சிறுவனை மீட்டு, அவனுக்குத் தேவையான மருத்துவச் சிகிச்சையையும் உணவையும் வழங்கி, அவனது பெற்றோரிடம் பாதுகாப்பாக ஒப்படைக்க வேண்டும் என்றும், இந்த அவல நிலைக்குக் காரணமானவர்கள் மீது கடுமையான சட்ட நடவடிக்கை எடுக்க வேண்டும் என்றும் உள்ளூர் மக்களும் சமூக ஆர்வலர்களும் வலியுறுத்தியுள்ளனர்.