“ரூ.30,000 செலவு… 1.3 மில்லியன் ஃபாலோயர்ஸ்… கிரெடிட் முழுசும் அவருக்கு மட்டும் இல்ல…” வைரல் யூடியூபருக்கு எதிராகத் திரண்ட உள்ளூர் மக்கள்… பின்னணியில் வெளிவந்த அதிர்ச்சி உண்மை..! ஜ்னார் நதி விவகாரத்தில் நடந்தது என்ன..?!

மத்தியப் பிரதேச மாநிலம் ராஜ்கர் மாவட்டம் பியாவ்ராவில் உள்ள அஜ்னார் நதியைச் சுத்தம் செய்வது தொடர்பாக, சமூக ஊடகங்களில் ஒரு புதிய சர்ச்சை எழுந்துள்ளது. ‘பிட்டு தபாகி’ என்ற பெயரில் புகழ்பெற்ற சுரேந்திர சிங் சவுத்ரி என்ற யூடியூபர், எந்தவித அரசு உதவியும் இயந்திரங்களும் இல்லாமல் தனி நபராகத் தன் சொந்தச் செலவில் அஜ்னார் நதியைச் சுத்தம் செய்ததாகக் கூறி வீடியோக்களை வெளியிட்டார். இவருடைய இந்த முயற்சி சமூக வலைத்தளங்களில் வைரலாகி, தொழில்அதிபர் ஆனந்த் மஹிந்திரா, மத்தியப் பிரதேச முதல்வர் டாக்டர் மோகன் யாதவ் மற்றும் நெதர்லாந்தைச் சேர்ந்த ‘தி ஓஷன் கிளீனப்’ அமைப்பின் நிறுவனரான போயன் ஸ்லாட் உள்ளிட்ட பலரின் பாராட்டுகளையும் வேலை வாய்ப்பு சலுகையையும் பெற்றது.

ஆனால், அஜ்னார் நதியைச் சுத்தம் செய்த முழுப் புகழும் பிட்டு தபாகி என்ற ஒரு தனிநபருக்கே உரியது என்ற கூற்றை ‘அஜ்னார் பச்சாவ் சமிதி’, நகராட்சி நிர்வாகம் மற்றும் உள்ளூர் மக்கள் கடுமையாக மறுத்துள்ளனர். 2016-ஆம் ஆண்டிலிருந்தே சமூக அமைப்புகள், நகராட்சி நிர்வாகம் மற்றும் உள்ளூர் பொதுமக்கள் இணைந்து கூட்டுப் பிரச்சார இயக்கம் மூலம் அஜ்னார் நதியைத் தொடர்ந்து சுத்தம் செய்து வருவதாகவும், பிட்டு தபாகி இந்த கூட்டுப் பணிகளில் ஒரு பகுதியாக மட்டுமே பங்குபெற்றார் என்றும் அவர்கள் கூறுகின்றனர். இதனால் அஜ்னார் நதியைச் சுத்தம் செய்ததற்கான உண்மையான பெருமை யாருக்குச் சேர வேண்டும் என்பதில் தற்போது சர்ச்சை எழுந்துள்ளது.

பிட்டு தபாகி தனியாகவே 30,000 ரூபாய் செலவழித்து உபகரணங்களை வாங்கி நதியைச் சுத்தம் செய்ததாகக் கூறியதை அடுத்து அவருக்கு சமூக வலைத்தளங்களில் லட்சக்கணக்கான பின்பற்றுபவர்கள் உருவாகினர். முதல்வர் மோகன் யாதவ் அவரை நேரில் அழைத்து பாராட்டி கௌரவித்ததுடன், இளைஞர்களுக்கு அவர் ஒரு சிறந்த முன்மாதிரி என்றும் புகழ்ந்தார். இருப்பினும், கடந்த 6-7 ஆண்டுகளாகத் தொடர்ச்சியாக நதியை மீட்க உழைத்து வரும் தங்களின் கூட்டு முயற்சியை மறைத்து, ஒரு தனிநபர் மட்டுமே முழுப் புகழையும் எடுத்துக்கொள்வது நியாயமற்றது என உள்ளூர் சமூக அமைப்புகளும் அதிகாரிகளும் கேள்வி எழுப்பியுள்ளதால் இச்சம்பவம் தற்போது புதிய திருப்பத்தை எட்டியுள்ளது.