வறுமையின் கொடுமை..! வீட்டில் சாப்பிட உணவில்லை… மேகியில் விஷம் கலந்து 3 குழந்தைகள் உள்பட ஒரே குடும்பத்தைச் சேர்ந்த 5 பேர் தற்கொலை.. நெஞ்சை உலுக்கும் அதிர்ச்சி சம்பவம்..!

கிரேட்டர் நொய்டாவில் நிலவிய கடுமையான பொருளாதார நெருக்கடி காரணமாக, ஒரே குடும்பத்தைச் சேர்ந்த ஐந்து பேர் மேகியில் விஷம் கலந்து சாப்பிட்டு தற்கொலை செய்துகொண்டதாகக் கூறப்படும் அதிர்ச்சிச் சம்பவம் பெரும் சோகத்தை ஏற்படுத்தியுள்ளது. உயிரிழந்தவர்கள் ரபூபுரா காவல் நிலைய எல்லைக்குட்பட்ட நக்லா ஸ்ரீ பதம் கிராமத்தைச் சேர்ந்த 37 வயது மகேஷ், அவரது 35 வயது மனைவி லலிதா, 11 வயது மகன் லட்டு, 7 வயது மகள் மிஷ்டி மற்றும் 3 வயது மகன் சாக்ஷாத் என அடையாளம் காணப்பட்டுள்ளனர். கோடீஸ்வரர்களும் ஆடம்பரங்களும் நிறைந்த ஒரு நகரத்தில், வறுமையின் காரணமாக ஒரு குடும்பமே உயிரிழந்திருப்பது ஒட்டுமொத்த சமூகத்தையும் உலுக்கியுள்ளது.

மகேஷின் குடும்பம் கடந்த சில காலமாகவே மிகக் கடுமையான நிதி நெருக்கடியால் சொல்லொணாத் துயரங்களைச் சந்தித்து வந்துள்ளதாக அவர்களுக்கு நெருக்கமானவர்கள் தெரிவித்துள்ளனர். சம்பவத்தன்று இரவில் அவர்களது வீட்டில் சமைப்பதற்கு வேறு எந்த உணவும் இல்லாத நிலையில், வறுமையின் உச்சகட்டமாக அவர்கள் அனைவரும் மேகி நூடுல்ஸ் சாப்பிட்டுவிட்டுத் தூங்கச் சென்றுள்ளனர். மறுநாள் காலையில் அவர்களது வீட்டிலிருந்து எவ்வித சத்தமும் வராமல் ஒருவித சுடுகாட்டு அமைதி நிலவியதால், சந்தேகமடைந்த அக்கம் பக்கத்தினர் உள்ளே சென்று பார்த்தபோது ஒட்டுமொத்த குடும்பமும் படுக்கையிலேயே சடலமாகக் கிடப்பதைக் கண்டு அதிர்ச்சியடைந்து போலீசாருக்குத் தகவல் கொடுத்தனர்.

முதற்கட்ட விசாரணையில் இது உணவு நச்சு காரணமாக ஏற்பட்ட மரணமாக இருக்கலாம் எனச் சந்தேகிக்கப்பட்டாலும், கடுமையான வறுமை மற்றும் கடன் தொல்லை காரணமாக மகேஷ் தனது குடும்பத்தினரை வறுமையிலிருந்து நிரந்தரமாக விடுவிக்க மேகியில் விஷம் கலந்து கொடுத்துவிட்டுத் தானும் தற்கொலை செய்துகொண்டிருக்கலாம் என்ற திடுக்கிடும் தகவலும் பரவி வருகிறது. இந்த நெஞ்சைப் பிளக்கும் துயரச் சம்பவம் குறித்து போலீசார் வழக்குப் பதிவு செய்து தீவிர விசாரணை நடத்தி வரும் நிலையில், பிரேதப் பரிசோதனை அறிக்கை வந்த பிறகே மரணத்தின் பின்னணியில் உள்ள உண்மையான காரணம் வெளிவரும் என்று கூறப்படுகிறது.