பாலிவுட்டில் மீண்டும் அட்லீ..! “ஜவான்” பார்ட் 2 ரெடி.. ஷாருக்கானுக்காக அட்லீ தயார் செய்த மிரட்டல் ஸ்கிரிப்ட் அடுத்த ஆட்டம் ஆரம்பம்…!

இயக்குநர் அட்லீ மற்றும் பாலிவுட் பாட்ஷா ஷாருக்கான் மீண்டும் இணையப்போகும் செய்திகள் தற்போது இணையத்தில் வைரலாகி வருகின்றன. கடந்த 2023-ம் ஆண்டு இவர்கள் கூட்டணியில் வெளியான ‘ஜவான்’ திரைப்படம் உலகளவில் 1,100 கோடி ரூபாய்க்கும் மேல் வசூலித்து மாபெரும் சாதனை படைத்தது. இந்த பிரம்மாண்ட வெற்றியைத் தொடர்ந்து, இப்படத்தின் இரண்டாம் பாகத்திற்கான (Jawan 2) ஆரம்பகட்டப் பணிகள் தற்போது விறுவிறுப்பாக நடைபெற்று வருவதாகத் தகவல்கள் தெரிவிக்கின்றன.

தற்போது ஷாருக்கான் தனது மகள் சுஹானா கானுடன் இணைந்து நடிக்கும் ‘கிங்’ (King) திரைப்படத்தில் பிஸியாக இருக்கிறார். இந்தப் படத்தின் படப்பிடிப்பு முடிந்தவுடன், அவர் அட்லீ இயக்கத்தில் ‘ஜவான் 2’ படத்தில் இணைவார் என்று கூறப்படுகிறது. இதற்கான திரைக்கதை அண்மையில் இறுதி செய்யப்பட்டுவிட்டதாகவும், அடுத்த ஆண்டு இந்தப் படத்தின் படப்பிடிப்பு தொடங்கும் என்றும் எதிர்பார்க்கப்படுகிறது.

முதல் பாகத்தில் விஜய் சேதுபதி வில்லனாக நடித்து மிரட்டியது போலவே, இரண்டாம் பாகத்திலும் ஒரு தென்னிந்திய முன்னணி நடிகரை வில்லனாகக் களமிறக்க அட்லீ திட்டமிட்டுள்ளார். இதற்கிடையில், இயக்குநர் அட்லீ தற்போது அல்லு அர்ஜுன் மற்றும் தீபிகா படுகோன் நடிக்கும் ‘ராக்கா’ (Raaka) திரைப்படத்தை இயக்கி வருகிறார். இந்தப் பணிகளை முடித்த பிறகு, ஷாருக்கானுடன் அவர் மீண்டும் இணைவது உறுதி என கோலிவுட் மற்றும் பாலிவுட் வட்டாரங்களில் பேசப்படுகிறது.