“2 வயசுல இருந்து இந்தியாவில் தான் இருக்கேன்… காரணமே இல்லாம வெளியேற சொல்றாங்க..” FRRO நோட்டீஸ எதிர்த்து அதிரடி வழக்கு தொடர்ந்த பிரபல நடிகர்..!!

நடிகர் இம்ரான் கான் தனக்கு எதிராக பிறப்பிக்கப்பட்ட வெளிநாட்டவர் பிராந்திய பதிவு அலுவலகத்தின் உத்தரவை எதிர்த்து பம்பாய் உயர் நீதிமன்றத்தில் ரிட் மனு தாக்கல் செய்துள்ளார். இந்திய அரசியலமைப்புச் சட்டத்தின் 14 மற்றும் 21-வது பிரிவுகளை சுட்டிக்காட்டியுள்ள அவர், எந்தவிதமான உறுதியான காரணமோ, ஆதாரப் பொருட்களோ அல்லது குறிப்பிட்ட சட்ட மீறல்களோ தெரிவிக்கப்படாமல் தனக்கு நாட்டை விட்டு வெளியேறும் நோட்டீஸ் அனுப்பப்பட்டுள்ளதாகக் குறிப்பிட்டுள்ளார். மேலும், எந்தவித விசாரணையோ அல்லது தற்காப்புக்கான வாய்ப்போ வழங்கப்படாமல் இந்த உத்தரவு பிறப்பிக்கப்பட்டுள்ளதாகவும், இது முழுக்க முழுக்கச் சட்டத்திற்குப் புறம்பானது என்றும் தனது மனுவில் தெரிவித்துள்ளார்.

தான் எந்தவிதமான இமிகிரேஷன் விதிகளையும் மீறவில்லை என்றும், கடந்த 2 வயது முதல் இந்தியாவில் அமைதியான முறையில் வாழ்ந்து வருவதாகவும் இம்ரான் கான் தரப்பில் தெரிவிக்கப்பட்டுள்ளது. தனக்கு எதிராக எந்தவொரு குற்றப் பின்னணியும் இல்லாத நிலையில், தான் ஒரு பொதுப் பிரமுகர் (Public Figure) என்பதன் காரணமாகவே குறிவைத்து இந்த நடவடிக்கை எடுக்கப்பட்டுள்ளதாக அவர் குற்றம்சாட்டியுள்ளார். மேலும், ஊடகங்கள் தன்னைச் சூழ்ந்து கொண்டபோது ஏற்பட்ட சூழலுக்கும் தனக்கும் எந்தத் தொடர்பும் இல்லை என்றும், காவல்துறையின் அறிவுறுத்தல்களைத் தான் முழுமையாகப் பின்பற்றியதாகவும் மனுவில் விளக்கம் அளிக்கப்பட்டுள்ளது.

இந்த நோட்டீசுக்கு உடனடியாகத் தடை விதிக்க வேண்டும் என்று நீதிமன்றத்தைக் கோரியுள்ள மனுதாரர் தரப்பு, இது சட்டப்பூர்வ அதிகாரங்களின் தவறான மற்றும் தன்னிச்சையான பயன்பாடு எனக் குறிப்பிட்டுள்ளது. வழக்கறிஞர்கள் ஜூல்பிகர் மேமன், பர்வேஸ் மேமன் மற்றும் சிராக் நாயக் ஆகியோர் தாக்கல் செய்துள்ள இந்த மனுவில், இந்த உத்தரவு நடைமுறைப்படுத்தப்பட்டால் அது சரியான நீதியாக இருக்காது என்றும், இந்தியாவின் அரசியலமைப்புச் சட்ட விதிகளுக்குச் செய்யப்படும் அவமதிப்பாக மாறும் என்றும் கடுமையாக எச்சரிக்கப்பட்டுள்ளது.