CINEMA
“என் முகத்தில் எங்கே அசௌகரியம் தெரிகிறது..? வைரலான அந்த ஒரு வீடியோ… விமர்சித்தவர்களைக் கேள்வியால் திணறடித்த பிரபல நடிகை..!!
நடிகை கீர்த்தி சுரேஷ் மற்றும் இயக்குநர் மிஷ்கின் இணைந்து நடித்துள்ள ‘சத்தியவான் சாவித்திரி’ திரைப்படத்தின் பத்திரிகையாளர் சந்திப்பில் இடம்பெற்ற சம்பவம் தற்போது இணையத்தில் பேசுபொருளாகியுள்ளது. Drumsticks Productions மற்றும் Zee Studios இணைந்து தயாரித்துள்ள இப்படத்தை வெடிக்காரன்பட்டி S. சக்திவேல் தயாரிக்க, அறிமுக இயக்குநர் பிரவீன் S. விஜய் இயக்கியுள்ளார்; திரில்லர் பாணியில் உருவாகியுள்ள இப்படம் நவம்பர் 20ஆம் தேதி உலகம் முழுவதும் வெளியாகவுள்ளது. பத்திரிகையாளர் சந்திப்பில் பேசிய மிஷ்கின், கீர்த்தி சுரேஷை தமது மகளைப் போலப் பார்ப்பதாகவும், அவரிடம் அபாரமான நடிப்புத் திறமை இருப்பதாகவும், சாவித்திரி பெயரில் உருவான படத்தில் அவர் நடித்திருப்பது மகிழ்ச்சி அளிப்பதாகவும், இன்னும் 20 முதல் 25 ஆண்டுகள் தொடர்ந்து நடிக்க வேண்டும் என்றும் பாராட்டியதோடு, இசையமைப்பாளர் சாம் C.S. மற்றும் இயக்குநர் பிரவீன் S. விஜயின் பங்களிப்புகளையும் பாராட்டி படத்திற்கு ஆதரவளிக்கக் கேட்டுக்கொண்டார்.
இந்நிகழ்வின்போது மிஷ்கின், கீர்த்தி சுரேஷைத் தொட்டுப் பேசிய காட்சி அடங்கிய வீடியோ இணையத்தில் வைரலான நிலையில், இதைப் பார்த்த சிலர் கீர்த்தி அப்போது அசௌகரியமாக உணர்ந்ததாகக் கருத்துத் தெரிவித்ததால் சமூக வலைதளங்களில் விவாதம் எழுந்தது. மிஷ்கின் கீர்த்தி சுரேஷிடம் பேசிய வீடியோ வைரலான நிலையில், அதற்கு நடிகை அளித்துள்ள பதில் கவனம் பெற்றுள்ளது.
தனக்கு அசௌகரியம் ஏற்பட்டதாகக் கூறியவர்களுக்குப் பதிலளித்த கீர்த்தி சுரேஷ், “முதலாவதாக, என் முகத்தில் உங்களுக்கு எங்கே அசௌகரியம் தெரிகிறது? நாங்கள் தந்தைக்கும் மகளுக்கும் இடையேயான பந்தம் போல இருக்கிறோம் என்று அவரோ நானோ சொன்னதை நீங்கள் கேட்கவில்லையா? இரண்டாவதாக, எனக்குச் சங்கடமாக இருந்தது என்று வைத்துக்கொண்டால், திரைப்படங்களில் எங்களைத் தொடுவார்கள் என்பதால் பொது இடங்களிலும் நான் அதனுடன் இயல்பாக இருக்க வேண்டும் என்று சொல்கிறீர்களா? நீங்கள் சில விஷயங்களைச் சரியாகப் புரிந்துகொள்ள வேண்டும் சகோதரா” என்று தெரிவித்துள்ளார்; கீர்த்தி சுரேஷின் இந்த நேரடியான பதில் தற்போது சமூக வலைதளங்களில் வைரலாகி வருகின்றது.
