“மகள் வயசு தான் இருக்கும்…” சிறுமியின் வாழ்கையை சீரழித்த வாலிபர்… நீதிமன்றத்தின் அதிரடி உத்தரவு…!!

காஞ்சீபுரம் மாவட்டம் ஐயம்பேட்டை அன்னை சத்யாநகரைச் சேர்ந்த முரளி (33) என்பவர், கடந்த 2019-ஆம் ஆண்டில் சிறுமி ஒருவருக்குப் பாலியல் ரீதியாகக் கொடுமை செய்துள்ளார். இதுகுறித்து பாதிக்கப்பட்ட சிறுமியின் தந்தை அளித்த புகாரின் அடிப்படையில், வாலாஜாபாத் காவல் நிலையத்தினர் வழக்குப் பதிவு செய்து முரளியைக் கைது செய்து சிறையில் அடைத்தனர். இந்த வழக்கு தொடர்பான சட்டப் போராட்டங்கள் காஞ்சீபுரம் போக்சோ சிறப்பு நீதிமன்றத்தில் தொடர்ந்து நடைபெற்று வந்த நிலையில், காவல் ஆய்வாளர் வெற்றிச்செல்வன் மற்றும் அரசு வழக்கறிஞர் கண்ணன் ஆகியோர் குற்றவாளிக்கு எதிரான அனைத்து ஆதாரங்களையும் நீதிமன்றத்தில் சமர்ப்பித்து குற்றத்தை உறுதிபட நிரூபித்தனர்.

இந்த வழக்கை முழுமையாக விசாரித்த போக்சோ நீதிமன்ற நீதிபதி தீப்தி அறிவுநிதி, குற்றம் சாட்டப்பட்ட முரளிக்கு 20 ஆண்டுகள் கடுங்காவல் சிறை தண்டனையும், 50 ஆயிரம் ரூபாய் அபராதமும் விதித்து அதிரடித் தீர்ப்பளித்துள்ளார். மேலும், விதிக்கப்பட்ட அபராதத் தொகையைக் கட்டத் தவறினால் கூடுதலாக ஒரு ஆண்டு சிறை தண்டனையை அனுபவிக்க நேரிடும் என்றும் அந்தத் தீர்ப்பில் தெளிவுபடுத்தியுள்ளார். காஞ்சீபுரம் நீதிமன்ற வளாகத்தில் பெரும் பரபரப்பை ஏற்படுத்திய இந்தத் தீர்ப்பு, சிறுமிகளுக்கு எதிரான பாலியல் குற்றங்களில் ஈடுபடுவோருக்குக் கடுமையான எச்சரிக்கையாக அமைந்துள்ளது.