ஆன்லைன் திருடர்களுக்கு விழுந்த பலத்த அடி…தம்பி, அண்ணான்னு இனி பேர் காட்டாது…என்பிசிஐ (NPCI) கொண்டு வந்த புதிய ‘உண்மைப் பெயர்’…அதிரடிப் புதிய விதி அமல்…!

கூகுள் பே, போன்பே, பேடிஎம் மற்றும் பீம் உள்ளிட்ட யுபிஐ செயலிகளைப் பயன்படுத்தும் வாடிக்கையாளர்களுக்கு முக்கிய அறிவிப்பு ஒன்று வெளியாகியுள்ளது. டிஜிட்டல் பண மோசடிகளைத் தடுக்கும் நோக்கில், இந்திய தேசிய கொடுப்பனவு கழகம் (NPCI) கொண்டு வந்துள்ள புதிய ‘உண்மைப் பெயர்’ (Real Name) விதிமுறை ஜூன் 1, 2026 முதல் நாடு முழுவதும் அதிகாரப்பூர்வமாக அமலுக்கு வந்துள்ளது. இதுவரை யுபிஐ செயலிகளில் நாம் சேமித்து வைத்த பெயர்களோ (அண்ணா, தம்பி, நண்பர்) அல்லது வணிகர்கள் தங்களுக்கு விருப்பமான முறையில் எடிட் செய்து வைத்த பெயர்களோதான் திரையில் தோன்றும். ஆனால், இனிமேல் அத்தகைய வசதிகள் முற்றிலும் நீக்கப்பட்டு, பணம் பெறுநரின் வங்கிக் கணக்கில் பதிவு செய்யப்பட்டுள்ள அதிகாரப்பூர்வ முழு பெயர் (Bank Registered Legal Name) மட்டுமே திரையில் காண்பிக்கப்படும்.

இந்தியாவில் டிஜிட்டல் பரிவர்த்தனைகள் அசுர வேகத்தில் வளர்ந்து வரும் நிலையில், கடந்த நிதியாண்டில் மட்டும் 24,162 கோடிக்கும் அதிகமான யுபிஐ பரிவர்த்தனைகள் நடைபெற்றுள்ளதாகப் பத்திரிகை தகவல் பணியகம் (PIB) தெரிவித்துள்ளது. இவ்வளவு பெரிய சந்தையில் போலி பெயர்களைப் பயன்படுத்தி, பிரபல நிறுவனங்கள் அல்லது உறவினர்கள் போல நடித்து மக்களை ஏமாற்றும் ஆன்லைன் மோசடிகள் அதிகரித்து வருகின்றன. இதைக் கட்டுப்படுத்தவே இந்த அதிரடி மாற்றம் கொண்டு வரப்பட்டுள்ளது. இனிமேல் பயனர்கள் தங்களது யுபிஐ பின் (UPI PIN) எண்ணை உள்ளிடுவதற்கு முன்பே, பணம் போய் சேர வேண்டிய நபரின் உண்மையான வங்கிப் பெயர் தெரிந்துவிடும் என்பதால், தவறான நபர்களுக்கோ அல்லது மோசடியாளர்களுக்கோ பணம் அனுப்பும் அபாயம் பெருமளவு குறையும்.

இந்தப் புதிய விதிமுறையின்படி, யுபிஐ செயலிகளில் பயனர்கள் தங்களுக்குத் தேவையான பெயர்களை எடிட் செய்யும் ஆப்ஷன் (Edit Option) முழுமையாக நீக்கப்படும். வங்கியின் கோர் பேங்கிங் சிஸ்டத்தில் (Core Banking System) என்ன பெயர் உள்ளதோ, அது மட்டுமே காட்டப்படும். எனவே, பொதுமக்கள் தங்களது கூகுள் பே, போன்பே உள்ளிட்ட அனைத்து யுபிஐ செயலிகளையும் கூகுள் பிளே ஸ்டோர் அல்லது ஆப் ஸ்டோரில் உடனடியாகப் புதுப்பித்துக் கொள்ள (Update) அறிவுறுத்தப்படுகிறார்கள். மேலும், அடிக்கடி பணம் அனுப்பும் நபர்கள் மற்றும் சிறு வணிகர்களின் பெயர்களைச் சரிபார்த்து, ஏதேனும் சந்தேகங்கள் இருந்தால் நேரடியாக உறுதி செய்து கொள்ளுமாறு வல்லுநர்கள் கேட்டுக்கொண்டுள்ளனர். டிஜிட்டல் இந்தியா இயக்கத்தை மேலும் வலுப்படுத்தும் இந்த பாதுகாப்பு கவசம் நுகர்வோரின் நம்பிக்கையை அதிகரிக்கும் என எதிர்பார்க்கப்படுகிறது.