பகீர்..! ஏரியா கெத்து தகராறில் கொடூரம்… வாள், கோடரியுடன் துரத்திச் சென்று ரவுடி சதீஷ் மராத்தா படுகொலை..! 3 சிறார்கள் உட்பட 9 பேர் சிக்கிய திடுக்கிடும் பின்னணி.!!

சூரத்தின் பேஸ்தான் பகுதியில் 32 வயதான பிரபல ரவுடி சதீஷ் தாக்டே என்ற சதீஷ் மராத்தா, கூர்மையான ஆயுதங்களால் தாக்கப்பட்டுக் கொடூரமாகக் கொல்லப்பட்ட வீடியோ இணையத்தில் வைரலாகி அதிர்ச்சியை ஏற்படுத்தியுள்ளது. தனது பெண் தோழியுடன் காரில் சென்றுகொண்டிருந்தபோது, இருசக்கர வாகனத்தில் வந்த நபர் காரின் ஜன்னலை உடைத்து தகராறு செய்துள்ளார். நண்பரைத் தப்பிச் செல்லச் சொன்ன மராத்தா காரிலிருந்து இறங்கியபோது, அங்கு கூடி இருந்த 6 முதல் 8 நபர்கள் கொண்ட கும்பல், வாள்கள், கத்திகள் மற்றும் கோடரிகளுடன் அவரைத் துரத்தியுள்ளது. துப்பாக்கியால் சுடப்பட்டும், கூர்மையான ஆயுதங்களால் தலையில் பலமுறை தாக்கப்பட்டும் அவர் சம்பவ இடத்திலேயே உயிரிழந்தார். தற்காத்துக் கொள்ள முயன்றதில் அவரது விரல்களும் துண்டிக்கப்பட்டன.

இக்கொலைச் சம்பவம் தொடர்பாக மராத்தாவின் சகோதரர் ஹித்தேஷ் தாக்டே அளித்த புகாரின் பேரில், மூன்று சிறார்கள் உட்பட ஒன்பது பேரை போலீசார் கைது செய்துள்ளனர். தப்பி ஓட முயன்றபோது பிடிபட்ட குற்றவாளிகளில், சிறார்கள் நீதி வாரியத்தின் முன்பும், கேதன் சிர்சத், ராகுல் துபே, கரண் துபே, அஜித் கோஸ்வாமி, ஆகாஷ் தாக்கூர் மற்றும் ராகுல் கபூரே ஆகிய ஆறு பேர் நீதிமன்றத்திலும் ஆஜர்படுத்தப்பட்டு போலீஸ் காவலில் வைக்கப்பட்டுள்ளனர். பகுதியில் ஆதிக்கம் செலுத்துவது தொடர்பான தகராறே இத்தாக்குதலுக்குக் காரணம் எனச் சந்தேகிக்கப்படுகிறது.

முன்னதாக கோடதராவில் மராத்தா மீது மிளகாய்த்தூள் வீசித் தாக்குதல் நடத்தப்பட்ட நிலையில், தற்போதைய கொலைச் சதித்திட்டம் லாஜ்பூர் மத்திய சிறைக்குள் தீட்டப்பட்டதா என்றும் புலனாய்வாளர்கள் தீவிரமாக விசாரித்து வருகின்றனர். ரவுடி ராகுல் மண்டல் என்ற ராகுல் ‘அபார்ட்மென்ட்’ தனது கும்பல் உறுப்பினர் தாக்கப்பட்டதற்குப் பழிவாங்கும் நோக்கில் இத்தாக்குதலைத் திட்டமிட்டிருக்கலாம் என அஞ்சப்படுகிறது. மேலும், எஃப்.ஐ.ஆரில் அருண் யாதவ், ராஜ் பவார், பண்டி படேல் போன்றோரின் பெயர்களும் சேர்க்கப்பட்டு, இந்த வழக்கில் தொடர்புடைய அனைவரின் பங்களிப்பு குறித்தும் போலீசார் விசாரணை நடத்தி வருகின்றனர்.