ஸ்பீட் போஸ்ட்டுக்கு 5 ரூபாய்… ஸ்டாம்புகளுக்கு 5% கமிஷன்…! போஸ்ட் ஆபிஸ் உரிமம் மூலம் கல்லா கட்ட அருமையான சான்ஸ்… முழு விவரம் இதோ…!!

சொந்தமாகத் தொழில் தொடங்க நினைக்கும் சாமானிய மற்றும் நடுத்தர வர்க்க இளைஞர்களுக்குத் தபால் துறை ஒரு அரிய பொன்னான வாய்ப்பை வழங்குகிறது. இந்திய அஞ்சல் துறையுடன் இணைந்து வர்த்தகக் கூட்டாளராக மாறுவதற்கு வெறும் 5,000 ரூபாயைப் பாதுகாப்பு வைப்புத்தொகையாகச் செலுத்தினால் போதுமானது.

இத்திட்டத்தின் கீழ் தபால் நிலைய உரிமம் பெற்ற பிறகு, நீங்கள் வழங்கும் சேவைகளின் எண்ணிக்கையைப் பொறுத்து மாதந்தோறும் 20,000 ரூபாய் முதல் 50,000 ரூபாய் வரை கமிஷன் அடிப்படையில் எவ்வித நஷ்ட பயமும் இன்றிப் பாதுகாப்பாகச் சம்பாதிக்கலாம். இந்த அரசு உத்தரவாதத்துடன் கூடிய சுயதொழில் வாய்ப்பைப் பெறக் குறைந்தபட்சம் 18 வயது நிரம்பியிருக்க வேண்டும் மற்றும் அங்கீகரிக்கப்பட்ட ஏதேனும் ஒரு பள்ளியில் 8-ஆம் வகுப்புத் தேர்ச்சி பெற்றிருக்க வேண்டியது அவசியமாகும்.

இவ்வுரிமத்தைப் பெற்ற பிறகு, ஒவ்வொரு பதிவுத் தபாலுக்கும் 3 ரூபாயும், விரைவு அஞ்சலுக்கு  5 ரூபாயும் கமிஷனாகக் கிடைக்கும். மேலும், 100 ரூபாய்க்கு மேற்பட்ட பண அஞ்சல்களுக்கு 3.5% தரகுக் கட்டணமும், தபால் தலைகள் மற்றும் எழுதுபொருட்கள் விற்பனைக்கு 5% லாபமும் உங்களுடைய கணக்கிற்கு நேரடியாக வந்து சேரும். கிராமப்புற மற்றும் நகர்ப்புறங்களில் சொந்தமாகச் சிறிய கடையோ அல்லது ஒரு நிலையான இடமோ உள்ளவர்கள், இணையதளத்தைப் பற்றிய அடிப்படை அறிவுடன் இதற்குத் தாராளமாக விண்ணப்பிக்கலாம்.

தகுதியுடைய நபர்கள் இந்திய அஞ்சல் துறையின் அதிகாரப்பூர்வ இணையதளத்தில் (www.indiapost.gov.in) படிவத்தைப் பதிவிறக்கம் செய்து, பூர்த்தி செய்த பின் தங்களது அருகிலுள்ள முதன்மை தபால் நிலையத்தில் சமர்ப்பித்து இந்த வாழ்நாள் வணிக ஒப்பந்தத்தைப் பெற்றுக்கொள்ளலாம்.