“என் மகனை அடிச்சுக் கொன்னுட்டாங்க…” லேப்டாப்பில் மேனேஜர் போட்ட மாஸ்டர் பிளான்… இன்ஜினியர் மரணத்தில் அடுத்தடுத்து வெளிவரும் திடுக்கிடும் உண்மைகள்..!!

அயோத்தியில் உள்ள ‘யாஷ் பேப்பர் மில்’ ரசாயன ஆலையில் பணிபுரிந்து வந்த 26 வயதான ரசாயனப் பொறியாளர் ஆசிஷ் சிவ்ஹரே என்பவரின் சந்தேகத்திற்கிடமான மரணம் குறித்து அவரது குடும்பத்தினர் கொலைக் குற்றச்சாட்டைச் சுமத்தியுள்ளனர். கடந்த நான்கு ஆண்டுகளாக அங்கு பணியாற்றி வந்த இவர், செப்டம்பர் 26 அன்று ஆலையில் சடலமாகக் கண்டெடுக்கப்பட்டார். போலிஸார் இச்சம்பவத்தை தற்கொலை என சித்தரிக்க முயல்வதாகக் குற்றம் சாட்டியுள்ள அவரது பெற்றோர், கொலையாளிகளைக் காப்பாற்ற முயற்சி நடப்பதாகத் தெரிவித்துள்ளனர். எனினும், குடும்பத்தினரின் புகாரின் பேரில், யாஷ் பேப்பர் மில்லின் மேலாண் இயக்குநர் வேத் கிருஷ்ணா, மேலாளர் அபிஷேக் சிங் உள்ளிட்ட 7 பேர் மீது பாரதிய நியாய சன்ஹிதா பிரிவுகளின் கீழ் அயோத்தியா காவல்துறை வழக்குப் பதிவு செய்துள்ளது.

இறந்த பொறியாளரின் தந்தை அளித்த புகாரில், சனிக்கிழமை விடுமுறை நாளாக இருந்தபோதிலும் திட்டமிட்டு தனது மகனை வேலைக்கு அழைத்து இந்தக் கொலையைச் செய்துள்ளதாகக் குறிப்பிட்டுள்ளார். மேலும், உடலின் பல இடங்களில் காயங்கள் இருந்ததாகவும், ஷூக்கள் வழக்கமான இடத்திலிருந்து தொலைவில் கிடந்ததாகவும், சம்பவம் நடந்த இடத்தில் சிசிடிவி கேமராக்கள் இல்லை என்றும் தெரிவித்துள்ளார். மகன் பேசுவதை நிறுத்தி 1 மணி நேரத்திற்குள் அவனது மொபைல் சுவிட்ச் ஆஃப் ஆனதாகவும், இரவு 11 மணிக்கு நிறுவனத்திலிருந்து போன் செய்து உடனடியாக அயோத்தியாவுக்கு வரச்சொன்னதாகவும், அங்கு வந்த பிறகே மகன் இறந்தது தெரியவந்ததாகவும் குடும்பத்தினர் கூறியுள்ளனர்.

மேலும், நிறுவனத்தின் மேலாளர் அபிஷேக் சிங் தனது மகனிடமிருந்து ₹3,00,000 பெற்றுக் கொண்டு, கூடுதலாகப் பணம் கேட்டு மனரீதியாக அழுத்தம் கொடுத்து வந்ததாக ஆசிஷின் தந்தை குற்றம் சாட்டியுள்ளார். அத்துடன், ஆசிஷின் லேப்டாப்பைப் பயன்படுத்தி அவரே நிறுவனத்திற்கு ராஜினாமா கடிதத்தை மின்னஞ்சல் மூலம் அனுப்பியதாகவும், இதுகுறித்து கேட்ட தாய் பத்மாவிடம் போனில் தவறாக நடந்து கொண்டதாகவும் தெரிவித்துள்ளனர். காவல்துறையினர் இதுவரையில் யாரையும் கைது செய்யவில்லை என்றும், இந்த வழக்கு குறித்து தொடர்ந்து விசாரணை நடத்தி வருவதாகவும் அயோத்தியா கொத்வால் பங்கஜ் சிங் தெரிவித்துள்ளார்.