“திமுக ஆட்சியில் ரூ.2,000 கோடி சாலை ஊழல்..?” வெள்ளை அறிக்கை ரெடி..அமைச்சர் ஆதவ் அர்ஜுனா வெளியிட்ட அதிரடி குண்டு.. தமிழக அரசியலில் திடீர் பரபரப்பு..!!

கடந்த திமுக ஆட்சிக் காலத்தில் நெடுஞ்சாலைத் துறையில் பெருமளவில் முறைகேடுகள் நடந்துள்ளதாகத் தமிழ்நாடு அமைச்சர் ஆதவ் அர்ஜுனா மிகக் கடுமையான குற்றச்சாட்டை முன்வைத்துள்ளார். சென்னையில் செய்தியாளர்களைச் சந்தித்த அவர், முந்தைய ஆட்சியில் தேர்தல் நடைபெற்ற ஒரே ஒரு ஆண்டில் மட்டும் நெடுஞ்சாலைகளில் மேற்கொள்ளப்பட்ட ‘பேட்ச் வொர்க்’ எனப்படும் சாலைப் பழுதுபார்ப்புப் பணிகளில் சுமார் 2,000 கோடி ரூபாய் ஊழல் செய்யப்பட்டுள்ளதாக அதிரடித் தகவலை வெளியிட்டுள்ளார். இந்த மெகா ஊழல் முறைகேடுகள் தொடர்பாகத் தற்போதைய அரசு சார்பில் விரைவில் விரிவான வெள்ளை அறிக்கை ஒன்று வெளியிடப்படும் என்றும் அவர் உறுதியளித்தார்.

அரசின் விதிமுறைகளின்படி, 10 லட்சம் ரூபாய்க்குக் மேல் திட்ட மதிப்பீடு இருந்தால் கட்டாயம் திறந்தநிலை டெண்டர் கோரப்பட வேண்டும். ஆனால், இந்த முறைகேடுகளைத் திட்டமிட்டு மறைப்பதற்காகப் பழுதுபார்ப்புப் பணிகளின் திட்ட மதிப்பீடுகள் அனைத்தும் 10 லட்சம் ரூபாய்க்குக் குறைவாகவே பிரிக்கப்பட்டதாக அமைச்சர் குற்றம் சாட்டியுள்ளார். மேலும், தகுதிவாய்ந்த உண்மையான ஒப்பந்ததாரர்கள் எவருக்கும் பணி தராமல், போலியான நபர்களின் பெயர்களைப் பயன்படுத்தி இந்த 2,000 கோடி ரூபாய் நிதி முறைகேடாகக் கைமாற்றப்பட்டுள்ளதாகச் சுட்டிக்காட்டிய அவர், முன்னாள் அமைச்சர் எ.வ.வேலு பொறுப்பில் இருந்த இத்துறையில், சட்டப்பேரவையின் நிதி அனுமதியைப் பெறாமலேயே முன்னதாகவே பணி ஆணைகள் அவசர அவசரமாக வழங்கப்பட்டதாகவும் சாடினார்.

இவ்வாறு மக்கள் பணத்தைச் சுரண்டி, அதனைத் தேர்தலில் முறைகேடு செய்வதற்காகப் பயன்படுத்தியவர்கள் யாராக இருந்தாலும் அவர்கள் மீது சட்டப்படி மிகக் கடுமையான நடவடிக்கைகள் எடுக்கப்படும் என அமைச்சர் ஆதவ் அர்ஜுனா எச்சரித்துள்ளார். தற்போதைய அரசு வெளிப்படைத்தன்மையான நிர்வாகத்தை வழங்கத் தீவிரமாக முயன்று வரும் சூழலில், அனைத்துத் துறைகளிலும் முறைகேடுகளை வெளிக்கொணர துறைவாரியான ஆய்வுகள் தொடரும் எனக் குறிப்பிட்டுள்ளார். தற்போது நெடுஞ்சாலைத்துறை முறைகேடு தொடர்பான வெள்ளை அறிக்கை தயாரிக்கும் பணிகள் முடுக்கிவிடப்பட்டுள்ளதால், அடுத்தகட்டமாகச் சம்பந்தப்பட்ட முன்னாள் அமைச்சர்கள் மீதான சட்ட நடவடிக்கைகள் தீவிரமடையும் என எதிர்பார்க்கப்படுகிறது.