“நாங்க சின்ன வயசுல இருந்தே பார்த்ததில்லையே..” அந்த நிலத்துக்கு அனுமதி யார் கொடுத்தது..? முக்கிய பாதையில் எழுந்த ஆக்கிரமிப்புப் புகார்..!!

ஸ்ரீநகரில் உள்ள சங்கராச்சாரியார் கோவில் செல்லும் பாதையில் அமைந்துள்ள சையத் உஸ்மான் சாஹிப் மசார் எனப்படும் தர்காவின் சீரமைப்புப் பணிகள் தற்போது பெரும் சர்ச்சையை ஏற்படுத்தியுள்ளன. ஜம்மு-காஷ்மீர் அரசு டெண்டர் நடைமுறை மூலம் இதன் சீரமைப்புப் பணிகளுக்கான ஒப்பந்தத்தை வழங்கியதை அடுத்து, சில அமைப்புகளும் தலைவர்களும் இதற்கு கடும் எதிர்ப்புத் தெரிவித்துள்ளனர். மசார் அமைந்துள்ள அந்த இடத்தில் அதன் இருப்பு மற்றும் நிலப் பயன்பாடு குறித்த ஆவணங்களை முழுமையாகச் சரிபார்க்க வேண்டும் என்று அவர்கள் கோரிக்கை விடுத்துள்ளனர். இந்த விவகாரம் பூதாகரமாக வெடித்ததைத் தொடர்ந்து, மாவட்ட நிர்வாகம் வருவாய்த் துறை ஆவணங்களைச் சோதிக்கும் பணியைத் தொடங்கியுள்ளது.

‘சேவ் ஷார்தா கமிட்டி’ அமைப்பின் தலைவர் ரவீந்தர் ரெய்னா ‘எக்ஸ்’ சமூக வலைதளத்தில் இந்த விஷயத்தை எழுப்பி, சங்கராச்சாரியார் கோவிலுக்குச் செல்லும் வழியில் உள்ள இந்த மசார் குறித்து தங்களுக்கு இதற்கு முன்பு ஏன் எந்தத் தகவலும் தெரியாது என்று கேள்வி எழுப்பியுள்ளார். மேலும், அப்பாதையின் இருபுறமும் உள்ள நிலம் சமூக வனவியல் துறைக்குச் சொந்தமானது என்றும், தன் சிறு வயது முதல் அங்கு வந்து செல்பவர்களிடம் விசாரித்தபோது அப்படி ஒரு மசார் இருந்ததாகத் அவர்களுக்குத் தெரியவில்லை என்றும் அவர் குறிப்பிட்டுள்ளார். இதற்கிடையில், காஷ்மீரி பண்டிட் தலைவரான சஞ்சய் சரஃப், மசார் சீரமைப்புக்காக அரசு நிதி எவ்வாறு ஒதுக்கப்பட்டது மற்றும் உரிய துறைகளிடம் முறையான அனுமதி பெறப்பட்டதா என்பது குறித்து விசாரணை நடத்தப்பட வேண்டும் என்று வலியுறுத்தியுள்ளார்.

சங்கராச்சாரியார் கோவில் செல்லும் பாதையில் மசாரின் பெயரால் ஆக்கிரமிப்பு செய்யப்படுவதாக பாஜகவின் உள்ளூர் பிரிவு குற்றம் சாட்டியுள்ளது. இது வனத்துறை மற்றும் தேசிய பசுமை தீர்ப்பாயத்தின் விதிகளை மீறும் செயல இருக்கலாம் என்று அவர்கள் கூறுகின்றனர். எனினும், தங்களுக்கு எந்தவொரு சூஃபி தர்கா மீதும் ஆட்சேபனை இல்லை என்றும், மசாரின் பெயரில் மேற்கொள்ளப்படும் நில ஆக்கிரமிப்பு மீது மட்டுமே தங்களுக்குப் பிரச்சனை இருப்பதாகவும் பாஜக மூத்த தலைவர் அல்தாஃப் தாகூர் தெளிவுபடுத்தினார். இதற்கிடையே, டிவி9 பாரத்வர்ஷ் நடத்திய கள ஆய்வில், மசார் வளாகத்தில் அரபு எழுத்துக்கள் பொறிக்கப்பட்ட பழைய கல் கல்லறைகள் இருப்பது கண்டறியப்பட்டது. எனினும், இதன் வரலாற்றுப் பின்னணி அல்லது உண்மையான வயது என்ன என்பது உடனடியாக உறுதிப்படுத்தப்படவில்லை. நிர்வாகத்தின் வருவாய்த் துறை விசாரணைக்குப் பின்னரே இப்பணிகள் விதிகளின்படி நடக்கிறதா இல்லையா என்பது தெளிவாகத் தெரியவரும்.