“வாங்க தீபாவளிப் பொருட்கள் வாங்கி தருகிறேன்..” 3 சிறுவர்களை நயவஞ்சகமாகக் கடத்தி.. கொடூரமாக சித்திரவதை செய்த 38 வயது நபர்.. நடுங்க வைக்கும் பின்னணி..!!

சென்னை காசிமேடு பகுதியைச் சேர்ந்த 12 வயதுடைய மூன்று சிறுவர்கள் திடீரென மாயமான சம்பவம் தொடர்பாக விக்ரம் (38) என்ற நபரை காவல்துறையினர் கைது செய்துள்ளனர். தீபாவளிப் பொருட்கள் வாங்கித் தருவதாகக் கூறி சிறுவர்களை அழைத்துச் சென்ற அந்த நபர், பின்னர் அவர்களை ராயபுரம் பகுதியில் இறக்கிவிட்டுத் தப்பியோடியதாகத் தெரிகிறது. சிறுவர்கள் வீடு திரும்பியதைத் தொடர்ந்து இந்த கடத்தல் சம்பவம் குறித்துப் பெற்றோருக்குத் தெரியவந்தது.

பாதிக்கப்பட்ட சிறுவர்கள் அளித்த தகவலின்படி, தங்களை ஒரு தனி அறைக்கு அழைத்துச் சென்று அந்த நபர் கட்டாயப்படுத்தி துன்புறுத்தியதாகத் தெரிவித்துள்ளனர். மேலும், தங்களின் விருப்பத்திற்கு மாறாக மது மற்றும் சிகரெட் போன்ற பழக்கங்களுக்கு வற்புறுத்தியதாகவும், அதற்கு மறுத்தபோது தங்களுக்குப் உடல் ரீதியான பாதிப்புகளை ஏற்படுத்தி சித்திரவதை செய்ததாகவும் சிறுவர்கள் தங்களது பெற்றோரிடம் விவரித்துள்ளனர்.

இதனைக் கேட்டு அதிர்ச்சியடைந்த பெற்றோர் காசிமேடு காவல் நிலையத்தில் அளித்த புகாரின் பேரில், காவல்துறையினர் வழக்குப் பதிவு செய்து தீவிர விசாரணை நடத்தினர். தலைமறைவாக இருந்த விக்ரமை அதிரடியாகக் கைது செய்த போலீஸார், அவரை நீதிமன்றத்தில் ஆஜர்படுத்தி புழல் சிறையில் அடைத்தனர். இச்சம்பவம் அப்பகுதியில் பெரும் பரபரப்பை ஏற்படுத்தியுள்ளது.