“அத்தை, மைத்துனிக்கு நேர்ந்த கொடூரம்..” காரில் கூட்டிவந்து கத்தியால் குத்திய மருமகன்.. மீர்பேட்டை இரட்டைக்கொலை பரபரப்பு!

தெலுங்கானா ரங்காரெட்டி மாவட்டம் படங்பேட்டில் கடந்த நவம்பர் 4ஆம் தேதி நடந்த இரட்டைக்கொலை வழக்கின் மர்மத்தை மீர்பேட்டை போலீசார் அதிரடியாக முறியடித்துள்ளனர். இந்த கொடூர சம்பவத்தின் முக்கிய குற்றவாளியான முகமது சித்திக் என்பவரை நவம்பர் 5ஆம் தேதி போலீசார் கைது செய்தனர். தனது அத்தை நிரஞ்சன் பீ மற்றும் மைத்துனி முகமது ரேஷ்மா ஆகிய இருவரையும் கத்தியால் குத்தி படுகொலை செய்ததாக சித்திக் மீது குற்றம் சாட்டப்பட்டுள்ளது. மேலும், இந்த தாக்குதலின் போது அவரது மாமனார் யூசுப் என்பவருக்கும் கடுமையான கத்திக்குத்து காயம் ஏற்பட்டு, தற்போது அவர் மருத்துவமனையில் தீவிர சிகிச்சை பெற்று வருகிறார். சாய்விஹார் நகர் பேஸ்-2 பகுதியில் உள்ள வீட்டில் இந்த பயங்கர சம்பவம் அரங்கேறியுள்ளது.

போலீசாரின் முதற்கட்ட விசாரணையில், குடும்பத் தகராறு, பெரியவர்கள் முன்னிலையில் அவமதிக்கப்பட்டது மற்றும் சட்டப்படி நடவடிக்கை எடுக்கப்படும் என்ற எச்சரிக்கை காரணமாக ஏற்பட்ட முன்விரோதமே இந்த கொலைக்குக் காரணம் எனத் தெரியவந்துள்ளது. பெட்ரோல் பங்க்கில் வேலை செய்து வந்த யூசுப்பை காரில் வீட்டிற்கு அழைத்து வந்த குற்றவாளி சித்திக், வீட்டில் இருந்த மூன்று பேர் மீதும் கத்தியால் கண்மூடித்தனமாகத் தாக்குதல் நடத்தியுள்ளார். இதில் நிரஞ்சன் பீ மற்றும் ரேஷ்மா ஆகிய இருவரும் சம்பவ இடத்திலேயே ரத்த வெள்ளத்தில் பரிதாபமாக உயிரிழந்தனர். குற்றவாளியிடமிருந்து கொலைக்கு பயன்படுத்தப்பட்ட கத்தி, மாருதி வேகன் ஆர் கார் மற்றும் செல்போன் ஆகியவற்றை பறிமுதல் செய்த போலீசார், பிஎன்எஸ் (BNS) சட்டப்பிரிவுகள் 103(1) மற்றும் 109 ஆகியவற்றின் கீழ் வழக்குப்பதிவு செய்து தீவிர விசாரணை நடத்தி வருகின்றனர்.