“காக்கி சட்டைக்கே பாதுகாப்பு இல்லையா..?” போலீசாரை தாக்க முற்பட்ட திருநங்கைகள்… பெரும் பரபரப்பு சம்பவம்..!!

உத்தரப் பிரதேச மாநிலம் பதேபூரில் தீபாவளிப் பண்டிகைக்கான அன்புத்தொகை வசூலிப்பது மற்றும் தங்களின் பகுதி ஆதிக்கம் தொடர்பாகத் திருநங்கைகளின் இரு பிரிவினரிடையே ஏற்பட்ட மோதல், காவல் நிலையத்திற்குள் காவல்துறையினருடனேயே கைகலப்பாக மாறிய அதிர்ச்சி சம்பவம் அரங்கேறியுள்ளது. முதலில் ரக்ஷேபால்பூர் சந்திப்பில் இரு தரப்பினரும் பயங்கரமாக மோதிக்கொண்டதால், அந்தப் பகுதியில் சுமார் அரை மணி நேரத்திற்கும் மேலாகக் கடுமையான போக்குவரத்து நெரிசலும் சலசலப்பும் ஏற்பட்டது. இதையடுத்து, சம்பவ இடத்திற்கு விரைந்த காவல்துறையினர் இரு தரப்பினரையும் சமாதானப் பேச்சுவார்த்தைக்காகக் காக்ரேரு காவல் நிலையத்திற்கு அழைத்துச் சென்றனர்.

இருப்பினும், காவல் நிலையத்திற்குள் சென்ற பிறகும் திருநங்கைகளின் இரு பிரிவினருக்கும் இடையே மீண்டும் மோதல் வெடித்தது; அத்தோடு நில்லாமல், விலக்க முயன்ற காவல் நிலையப் பொறுப்பு அதிகாரி மற்றும் பிற காவலர்களுடனும் அவர்கள் கடுமையான வாக்குவாதத்தில் ஈடுபட்டுத் தாக்க முற்பட்டனர். காவல் நிலையத்திற்குள் காவல்துறையினருடன் திருநங்கைகள் கைகலப்பில் ஈடுபடும் இந்த அதிரடி வீடியோ காட்சிகள் தற்போது சமூக வலைத்தளங்களில் வெளியாகி பயங்கரமாக வைரலாகி வருகின்றன. இச்சம்பவத்தைத் தொடர்ந்து, பொது அமைதிக்குக் குந்தகம் விளைவித்தது மற்றும் அரசு ஊழியர்களைப் பணி செய்யவிடாமல் தடுத்தது ஆகிய குற்றங்களின் கீழ் இரு தரப்பினர் மீதும் காவல்துறையினர் வழக்குப் பதிவு செய்து தீவிர விசாரணை மேற்கொண்டு வருகின்றனர்.