நேபாள டூ குஜராத்… பேருந்தில் ரகசியமாகப் பயணித்த ரூ.10 கோடி.. சோதனையின் போது உறைந்துபோன அதிகாரிகள்.. பகீர் பின்னணி..!!

பீகார் மாநிலம் முசாபர்பூர் அருகே ஒரு பேருந்தில் கடத்தப்பட்ட, சர்வதேச சந்தையில் சுமார் 10 கோடி ரூபாய் மதிப்புள்ள 10 கிலோ கிராம் ஹாஷிஷ் போதைப்பொருளைப் பறிமுதல் செய்த போதைப்பொருள் தடுப்புப் பிரிவினர், ராஜேஷ் சாஹ்னி என்ற கடத்தல்காரரை அதிரடியாகக் கைது செய்துள்ளனர்.முசாபர்பூர் எல்லைப் பகுதியில் சந்தேகத்தின் பேரில் நடத்தப்பட்ட தீவிர வாகனச் சோதனையின்போது இந்த மாபெரும் போதைப்பொருள் கடத்தல் கும்பலின் சதி முறியடிக்கப்பட்டது. பிடிபட்ட போதைப்பொருளின் தரம் மற்றும் சர்வதேச சந்தை மதிப்பின் காரணமாக இப்பகுதியில் இந்தச் சம்பவம் பெரும் பரபரப்பை ஏற்படுத்தியுள்ளது.

காவல்துறையினரின் முதற்கட்ட விசாரணையில், நேபாள நாட்டிலிருந்து எல்லை கடந்து கொண்டுவரப்பட்ட இந்த உயர்தர ஹாஷிஷ் போதைப்பொருள், உத்தரப் பிரதேசத்தின் பஸ்தி வழியாகக் குஜராத் மாநிலத்தின் பதான் மற்றும் பிற அண்டை மாநிலங்களுக்கு விநியோகிக்கத் திட்டமிடப்பட்டிருந்தது அம்பலமாகியுள்ளது. இந்த விநியோகச் சங்கிலியின் பின்னணியில் ஒரு சர்வதேச போதைப்பொருள் கடத்தல் சிண்டிகேட் இயங்கி வருவது கண்டறியப்பட்டுள்ளது. இதன் தொடர்ச்சியாக, இந்த சர்வதேச நெட்வொர்க்கில் தொடர்புடைய மற்ற முக்கிய குற்றவாளிகளையும், இதன் பின்னணியில் உள்ள மாஃபியா கும்பலையும் கூண்டோடு பிடிக்கப் பீகார் காவல்துறையினர் மற்றும் போதைப்பொருள் கட்டுப்பாட்டுப் பிரிவினர் தீவிர விசாரணையை முடுக்கிவிட்டுள்ளனர்.