LATEST NEWS
பெரும் பரபரப்பு..! தமிழகமுதலீட்டு ரகசியங்கள் ஆந்திராவுக்கு கசிந்தது எப்படி..? – ‘கைடன்ஸ்’ அதிகாரிகளின் துரோகத்தால் அமைச்சர் கீர்த்தனாவுக்குப் புது நெருக்கடி..!!
ஹூண்டாய் மற்றும் கியா நிறுவனங்களுக்கு உதிரிபாகங்கள் தயாரித்து வழங்கும் ஹ்வாஷின், சியோன் மற்றும் இவாமெட் ஆகிய மூன்று தென் கொரிய நிறுவனங்கள், தமிழ்நாட்டில் தொழில் தொடங்குவது குறித்துப் பேச்சுவார்த்தை நடத்தி வந்தன. ஆனால், அந்த நிறுவனங்கள் சுமார் ₹1,614 கோடி மதிப்பிலான முதலீடுகளை ஆந்திராவின் அனந்தபூரில் மேற்கொள்ள ஒப்பந்தம் செய்துள்ளன. இதனால் தமிழ்நாட்டிற்குக் கிடைக்க வேண்டிய சுமார் 1,400-க்கும் மேற்பட்ட வேலைவாய்ப்புகள் பறிபோனதாகக் கூறப்படுகிறது.
இந்த விவகாரத்தின் தொடர்ச்சியாக, தமிழ்நாடு அரசின் முதலீட்டு ஊக்குவிப்பு முகமையான ‘கைடன்ஸ் தமிழ்நாடு’ (Guidance Tamil Nadu) அமைப்பில் பணியாற்றிய 15 மூத்த அதிகாரிகள் அதிரடியாகப் பணிநீக்கம் செய்யப்பட்டுள்ளனர். தமிழ்நாட்டில் தொழில் தொடங்க முன்வந்த நிறுவனங்களுடன் அரசு நடத்திய ரகசியப் பேச்சுவார்த்தைகள் மற்றும் சலுகைகள் குறித்த விவரங்களை இவர்கள் ஆந்திர அரசு அதிகாரிகளுக்குக் கசியவிட்டதாகச் சந்தேகிக்கப்படுகிறது. குறிப்பாக, பணிநீக்கம் செய்யப்பட்ட 15 அதிகாரிகளில் 3 பேர் தற்போது ஆந்திரப் பிரதேச அரசின் பொருளாதார மேம்பாட்டு வாரியத்தில் (APEDB) பணியில் சேர்ந்துள்ளதாக வெளியான தகவல், இந்தத் தகவல் கசிவுச் சந்தேகத்தை மேலும் வலுப்படுத்தியுள்ளது.
தமிழகத்திற்கு வரவேண்டிய தொழில் முதலீடுகள் ஆந்திராவுக்குத் திசைதிருப்பப்படுவதாக எதிர்க்கட்சிகள் தொடர்ந்து குற்றம்சாட்டி வந்த நிலையில், தொழில்துறை அமைச்சர் எஸ். கீர்த்தனா அதனை மறுத்து வந்தார். ஆனால், தற்போது அதிகாரிகள் பணிநீக்கம் செய்யப்பட்டதன் மூலம் எதிர்க்கட்சிகளின் குற்றச்சாட்டு உண்மையாகிவிட்டதாக விமர்சனங்கள் எழுந்துள்ளன. “முதலீடுகள் தொடர்பான ரகசியத் தரவுகளையே பாதுகாக்க முடியாத அரசால், திட்டங்கள் அண்டை மாநிலத்திற்குச் செல்வதை எப்படித் தடுக்க முடியும்?” என எதிர்க்கட்சியினர் கேள்வி எழுப்பியுள்ளனர். இது அமைச்சர் கீர்த்தனாவுக்கு எதிராக நடந்த திட்டமிட்ட சதியா அல்லது அதிகாரிகளின் முறைகேடா என்ற கோணத்தில் விசாரணை முடுக்கிவிடப்பட்டுள்ளதாகத் தகவல்கள் தெரிவிக்கின்றன.
