LATEST NEWS
“தட்டி தூக்கிய சகோதரர்கள்” வறுமையைத் தாண்டி NEET, JEE தேர்வில் சாதித்த அண்ணன் – தம்பி… கூலி தொழிலாளியின் வீட்டில் இரட்டிப்பு மகிழ்ச்சி…!!
பீகார் மாநிலம் கயா மாவட்டத்தைச் சேர்ந்த சோனு ராஜ் மற்றும் மோனு ராஜ் ஆகிய இரண்டு சகோதரர்கள், வறுமையையும் பொருளாதார நெருக்கடிகளையும் கடந்து உயர்கல்வியில் மாபெரும் சாதனை படைத்துள்ளனர். அண்ணன் சோனு ராஜ் நீட் 2026 தேர்வில் 636 மதிப்பெண்கள் பெற்று டெல்லியில் உள்ள மத்திய ஆயுதக் காவல் படை மருத்துவ அறிவியல் நிறுவனத்தில் மருத்துவப் படிப்பிற்கான இடத்தைப் பிடித்துள்ளார். இளைய சகோதரரான மோனு ராஜ் ஜேஇஇ மெயின் தேர்வில் 93-வது பெர்சென்டேஜ் பெற்று, பிர்லா தொழில்நுட்ப நிறுவனத்தின் மெஸ்ரா வளாகத்தில் வேதியியல் பொறியியல் படிப்பில் சேர இடம் பெற்றுள்ளார்.
இருவரும் ராஜஸ்தான் மாநிலம் கோட்டாவில் உள்ள ஆலன் பயிற்சி நிறுவனத்தில் இரண்டு ஆண்டுகள் தங்கி போட்டித் தேர்வுகளுக்குக் கடுமையாகத் தயாராகினர். கயாவில் உள்ள தானியச் சந்தையில் சுமை தூக்கும் தொழிலாளியாகப் பணியாற்றி வரும் தந்தை மனோஜ் குமார், விவசாய விளைபொருட்களை விற்க உதவுவதன் மூலம் கிடைக்கும் கமிஷன் மற்றும் மகாத்மா காந்தி தேசிய ஊரக வேலை உறுதித் திட்ட கூலி வேலைகள் மூலம் குடும்பத்தைக் காப்பாற்றி வந்தார். தாய் ரேஷ்மி தேவி இல்லத்தரசியாக இருந்து மகன்களின் கல்விப் பயணத்திற்கு உறுதுணையாக நின்றார்.
கோட்டாவில் பயிற்சி பெறுவதற்குத் தேவையான கூடுதல் பணத்திற்காகத் தங்கள் வசமிருந்த இரண்டு சிறிய விளைநிலங்களில் ஒன்றை தந்தை மனோஜ் குமார் விற்று மகன்களின் கல்விக்கு நிதியளித்தார். கயாவிலிருந்து கோட்டா சென்று மருத்துவர்களாகவும் பொறியாளர்களாகவும் மாறிய முன்னாள் மாணவர்களே தனக்கு உத்வேகம் அளித்ததாக மோனு ராஜ் தெரிவித்த நிலையில், பெற்றோரின் தியாகத்திற்குப் பலனளிக்கும் வகையில் குடும்பத்திற்கும் சமூகத்திற்கும் சேவை செய்யப் போவதாக இரு சகோதரர்களும் பெருமிதம் அடைந்துள்ளனர்.
