“என் உயிரைக் காப்பாத்தினது நீதான்..” சாமிக்கு தங்க கிரீடத்திற்கு பதிலா தங்க ‘ஹார்ட்’ கொடுத்த பக்தர்… பின்னணியில் உள்ள உருக்கமான காரணம்..!!

ராஜஸ்தான் மேவாரில் உள்ள புகழ்பெற்ற ஸ்ரீ சான்வலியாஜி கிருஷ்ணர் கோவிலில் பக்தர் ஒருவரின் அரிய பக்தி நிகழ்வு ஒன்று நடந்துள்ளது. ஜாலோர் மாவட்டத்தைச் சேர்ந்த பக்தர் ஒருவர், கடுமையான இதய நோயால் பாதிக்கப்பட்டு மேற்கொள்ளப்பட்ட அறுவை சிகிச்சை வெற்றிகரமாக முடிந்ததையடுத்து, கடவுள் சான்வலியா சேத்திற்கு நன்றி செலுத்தும் வகையில் 21 கிராம் சுத்தமான தங்கத்தால் செய்யப்பட்ட ‘இதய மாதிரியை’ காணிக்கையாக அளித்துள்ளார்.

ஜாலோர் மாவட்டத்தைச் சேர்ந்த அந்த பக்தர் நீண்ட நாட்களாக தீவிர இதய நோயால் அவதிப்பட்டு வந்தார். அவருக்கு அளிக்கப்பட்ட சிகிச்சையின் போதும், அறுவை சிகிச்சையின் போதும் அவர் முழுமையாக குணமடைய வேண்டும் என்று சான்வலியா சேத்திடம் வேண்டிக்கொண்டார். மருத்துவர்கள் செய்த இதய அறுவை சிகிச்சை வெற்றிகரமாக முடிந்து அவர் பூரண குணமடைந்தவுடன், நேராக சான்வலியாஜி கோவிலுக்கு வந்தார். அங்கிருந்த அதிகாரப்பூர்வ காணிக்கை அலுவலகத்தில் 21 கிராம் தங்கத்திலான இந்த விசித்திரமான ‘இதய மாதிரியை’ ஒப்படைத்து, கோவில் நிர்வாகத்திடம் அதற்கான ரசீதையும் பெற்றுக்கொண்டார்.

கோவில் நிர்வாகத்தின் தகவல்படி, 21 கிராம் தங்கத்தில் செய்யப்பட்ட இந்த இதய மாதிரியின் தற்போதைய சந்தை மதிப்பு ரூ.3 லட்சத்திற்கும் அதிகம் எனக் கூறப்படுகிறது. வழக்கமாக பக்தர்கள் கோவில்களில் இறைவனுக்கு தங்கம் மற்றும் வெள்ளியால் ஆன கிரீடம், மாலை, புல்லாங்குழல் அல்லது ஆபரணங்களை மட்டுமே காணிக்கையாக வழங்குவார்கள். ஆனால், தனது உறுப்பு குணமடைந்ததற்காகத் தங்கத்திலேயே இதய மாதிரி செய்து காணிக்கையளித்த இந்த அரிய பக்தி நிகழ்வு கோவில் வளாகத்திலும் பக்தர்கள் மத்தியிலும் பெரும் நெகிழ்ச்சியையும் ஆச்சரியத்தையும் ஏற்படுத்தியுள்ளது.