இந்த வயசுல இதெல்லாம் தேவையா..? தேர்வில் நல்ல மார்க் எடுத்த 15 வயது மகனுக்கு ₹2.30 கோடி BMW கார் வாங்கித் தந்த தந்தை… இணையவாசிகள் விவாதம்..!

மேற்கு வங்க மாநிலம் பர்தவான் மாவட்டத்தைச் சேர்ந்த அரிசி தொழிலதிபர் ஷம்சுத்தீன் மித்யா, ஒன்பதாம் வகுப்பு அரையாண்டுத் தேர்வில் நல்ல மதிப்பெண் பெற்ற தனது 15 வயது மகனுக்கு ₹2.30 கோடி மதிப்புள்ள பிஎம்டபிள்யூ சொகுசு காரைப் பரிசாக வழங்கியுள்ளார். முன்னதாக, அவரது மகன் முகமது தல்ஹா தன்னிடம் பிஎம்டபிள்யூ கார் வேண்டும் என்று கேட்டிருந்த நிலையில், தேர்வில் நல்ல மதிப்பெண்கள் எடுத்தால் கார் வாங்கித் தருவதாக தந்தை உறுதியளித்திருந்தார். தற்போது மகனுக்கு 15 வயதே ஆவதால் ஓட்டுநர் உரிமம் பெற முடியாது என்பதால், வாரத்தில் ஒரு நாள் தந்தையுடன் காரின் பயணியர் இருக்கையில் அமர்ந்து செல்லப்போவதாக அந்த மாணவர் கூறியுள்ளார்.

இந்தத் தொழிலதிபரின் கடந்த கால வாழ்க்கைப் பயணம் மிகவும் வியக்கத்தக்க ஒன்றாக உள்ளது. கடந்த 2003 ஆம் ஆண்டில் மும்பை பாலிவுட் திரைப்படத் துறையில் வெறும் லைட்மேனாகத் தனது வாழ்க்கையைத் தொடங்கிய ஷம்சுத்தீன், ஏழு ஆண்டுகள் கடுமையான போராட்டத்திற்குப் பிறகு 2010 இல் தனது சொந்த ஊருக்குத் திரும்பினார். அங்கு ஒரு சிறிய அரிசி வியாபாரத்தைத் தொடங்கி, இன்று மலேசியா, சிங்கப்பூர், வியட்நாம் மற்றும் துபாய் போன்ற நாடுகளுக்கு அரிசி ஏற்றுமதி செய்யும் அளவுக்குப் பிரம்மாண்டமாக வளர்ந்துள்ளார்.

சொகுசு மற்றும் பிரீமியம் ரக கார்கள் மீது மிகுந்த ஆர்வம் கொண்ட இவரிடம் ஏற்கனவே ரேஞ்ச் ரோவர், வோல்வோ, மஹிந்திரா தார் போன்ற ஆடம்பர கார்கள் உள்ளன. மேலும், இவரது பெரும்பாலான கார்களின் எண்கள் பாலிவுட் நடிகர் ஷாருக்கானின் வாகனங்களைப் போல ‘555’ என்ற விஐபி எண்களைக் கொண்டிருப்பது குறிப்பிடத்தக்கது. தனது இந்த அசாத்திய வெற்றிக்கு இறைவனின் கருணையே காரணம் என்று கூறும் அவர், யாருக்கும் தெரியாமல் பல ஏழை எளிய மக்களுக்கு ரகசியமாக நிதியுதவியும் செய்து வருகிறார்.