“டிகிரி வாங்குனது என்னவோ மாணவர்தான்… ஆனா கைதட்டலை அள்ளியது…” பட்டமளிப்பு விழாவுக்கே ‘சீஃப் கெஸ்ட்’ ஆக மாறிய செல்லப் பூனை…! ஒரே நாளில் 10 லட்சம் பார்வைகளைக் கடந்து இணையத்தைக் கலக்கும் நெகிழ்ச்சி வீடியோ..!!

பட்டமளிப்பு விழாக்கள் பொதுவாக மாணவர்கள் அணியும் தொப்பிகள், அங்கிகள், பட்டங்கள் மற்றும் பெருமிதம் கொள்ளும் குடும்ப உறுப்பினர்களைக் கொண்டதாகவே இருக்கும். ஆனால், கட்டிடக்கலை மாணவரான நாவல் தம்பில்கர் என்பவரின் பட்டமளிப்பு விழா இணையத்தில் அனைவரது கவனத்தையும் ஈர்க்கும் விதமாக அமைந்தது. அவர் தனது வளர்ப்புப் பூனையைத் தனது தோளில் அமர்த்தியபடி மேடைக்கு வந்து பட்டத்தைப் பெற்றுக் கொண்ட இந்த நெகிழ்ச்சியான தருணம், வீடியோவாகப் பதிவு செய்யப்பட்டு இணையத்தில் வைரலாகி வருகிறது.

சிறு பட்டமளிப்பு அங்கி அணிவிக்கப்பட்ட அந்த பூனை, புதிய மற்றும் அறியாத சூழ்நிலையிலும் எவ்வித பதற்றமும் இன்றி அமைதியாக அந்த விழாவில் பங்கேற்றது. மாணவர் நாவல் தம்பில்கர் தனது பட்டத்தைப் பெற மேடைக்குச் சென்றபோது, அங்கிருந்த பேராசிரியர்கள் மற்றும் பார்வையாளர்கள் அனைவரும் இந்த வித்தியாசமான விருந்தினரைக் கண்டு வியந்தனர். பட்டத்தைப் பெற்ற பிறகு புகைப்படங்களுக்குப் போஸ் கொடுத்தபோதும் அந்த பூனை அமைதியாகத் தோளிலேயே அமர்ந்திருந்தது. பேராசிரியர்களும் இந்த அழகிய பூனையைப் பார்த்துப் புன்னகைத்து, ஆசையோடு தடவிக் கொடுத்துத் தங்களது மகிழ்ச்சியை வெளிப்படுத்தினர்.

https://www.instagram.com/reel/Dcl0H4iz5n6/?utm_source=ig_web_button_share_sheet

இந்தச் சம்பவம் தொடர்பான வீடியோ ‘shutupnaval’ என்ற இன்ஸ்டாகிராம் கணக்கில் பகிரப்பட்டு, ஒரே நாளில் 1 மில்லியனுக்கும் அதிகமான பார்வைகளைப் பெற்று வைரலானது. இந்த வீடியோவைப் பார்த்த இணையவாசிகள் “படிப்பதற்கு இந்தப் பூனைதான் அவருக்கு உதவியிருக்கும்” என்றும், “பட்டமளிப்பு விழாவின் நிஜக் கதாநாயகன் இந்தப் பூனைதான்” என்றும் ஜாலியாகக் கருத்துகளைப் பதிவிட்டு வருகின்றனர். மேலும், மாணவரின் இந்த ஆசையை ஏற்று பூனையை மேடைக்கு அனுமதித்தக் கல்லூரி நிர்வாகத்தையும் பேராசிரியர்களையும் பலர் பாராட்டி வருகின்றனர்.