உண்மையான சூரியனுக்கே டஃப் கொடுக்கும் சீனா.. உலகை ஆளப்போகும் 100 மில்லியன் டிகிரி செல்சியஸ் செயற்கை சூரியன்.. விஞ்ஞான உலகையே வியக்கவைத்த சீன அறிவியல்..!!

சீனா தனது ‘செயற்கை சூரியன்’ திட்டத்திற்காக 582 மெட்ரிக் டன் எடையும், 21 மீட்டர் நீளமும் கொண்ட உலகின் மிகப்பெரிய சூப்பர் கண்டக்டிங் காந்தத்தை வெற்றிகரமாக சோதித்து ஒரு மாபெரும் மைல்கல்லை எட்டியுள்ளது. சீன அறிவியல் அகாடமியால் உள்நாட்டிலேயே முழுமையாக தயாரிக்கப்பட்ட இந்த ‘டி’ வடிவக் காந்தம், அணுக்கரு இணைவு உலைக்குள் தோன்றும் 100 மில்லியன் டிகிரி செல்சியஸ் வெப்பம் கொண்ட பிளாஸ்மாவை, உலையின் சுவர்களில் தொடாதவாறு காந்த விசை மூலம் காற்றில் மிதக்க வைக்கப் பயன்படுகிறது. பிரான்சில் உள்ள சர்வதேச ITER திட்ட காந்தங்களை விட இது 1.3 மடங்கு பெரியது மற்றும் 3 மடங்கு அதிக ஆற்றலைச் சேமிக்கக்கூடியது என்பது இதன் தனிச்சிறப்பாகும்.

சூரியனின் இயற்பியல் விதியை அடிப்படையாகக் கொண்டு செயல்படும் இந்த அணுக்கரு இணைவு தொழில்நுட்பத்திற்குத் தேவையான மூலப்பொருட்களைக் கடல் நீரிலிருந்தே மிக எளிதாகப் பிரித்தெடுக்க முடியும். ஒரு லிட்டர் கடல்நீரில் உள்ள டியூட்டீரியம் மூலப்பொருள், சுமார் 300 லிட்டர் பெட்ரோலை எரிப்பதற்குச் சமமான ஆற்றலை உற்பத்தி செய்யக்கூடியது. தற்போதைய அணு உலைகளை விட பாதுகாப்பான இந்த தொழில்நுட்பம், எவ்வித கதிரியக்கக் கழிவுகளையோ அல்லது பசுமை இல்ல வாயுக்களையோ வெளியிடாது என்பதால் புவி வெப்பமயமாதலைத் தடுக்கும் மிகச்சிறந்த மாற்று ஆற்றலாகக் கருதப்படுகிறது.

உலகில் தற்போது மிக அதிகமாகக் கார்பன் உமிழ்வை ஏற்படுத்தும் நாடாக இருக்கும் சீனா, வரும் 2060-ஆம் ஆண்டிற்குள் கார்பன் உமிழ்வற்ற நாடாக மாற இலக்கு நிர்ணயித்துள்ளது. எதிர்காலத்தில் உலகை ஆளப்போவது தூய்மையான எரிசக்தி தான் என்பதால், இந்தத் தொழில்நுட்பத்தை முதன்முதலில் வணிகரீதியாகக் கொண்டுவந்து உலகளாவிய ஆற்றல் சந்தையைத் தன் கட்டுப்பாட்டிற்குள் கொண்டுவர வேண்டும் என்ற நோக்கில் சீனா இந்தத் திட்டத்தை மிகத் தீவிரமாக முன்னெடுத்து வருகிறது.