“உடனே பதவி விலகுங்க..தேர்தல் முடிவுகளில் மெகா முறைகேடா..?!” தலைமை தேர்தல் ஆணையர் ஞானேஷ் குமாருக்கு எதிராக மு.க.ஸ்டாலின் அதிரடி முழக்கம்..!!!

இந்தியத் தலைமைத் தேர்தல் ஆணையர் ஞானேஷ் குமார் தன்னிச்சையாகச் செயல்படுவதாகக் கூறி, அவர் உடனடியாகத் தனது பதவியை விலக வேண்டும் அல்லது அவரைப் பதவி நீக்கம் செய்ய வேண்டும் என்று திமுக தலைவர் மு.க.ஸ்டாலின் மிகக் கடுமையான கண்டனத்தைப் பதிவு செய்துள்ளார். வாக்காளர் பட்டியல் சிறப்புத் தீவிரத் திருத்த நடவடிக்கையின் போது, மற்ற இரண்டு தேர்தல் ஆணையர்களின் ஆட்சேபனைகளையும் மீறி தன்னிச்சையாக முடிவுகள் எடுக்கப்பட்டதாக ஊடகங்களில் வெளியான செய்திகள் அதிர்ச்சியை ஏற்படுத்தியுள்ளன. தலைமைத் தேர்தல் ஆணையரின் இத்தகைய செயல்பாடுகள் ஒட்டுமொத்த தேர்தல் ஆணையத்தின் மீதான நம்பகத்தன்மையையே முற்றிலுமாகச் சீர்குலைத்துள்ளதாக மு.க.ஸ்டாலின் குற்றம் சாட்டியுள்ளார்.

மாநிலங்களில் தேர்தலுக்குச் சில மாதங்களுக்கு முன்பு அவசர அவசரமாக நடத்தப்பட்ட இந்த SIR பணிகளின் காரணமாக, பல கோடி வாக்காளர்களின் பெயர்கள் நீக்கப்பட்டதாகப் புகார்கள் எழுந்துள்ளன. தற்போது வெளியாகியுள்ள ஆதாரங்களுடன் கூடிய இந்த அதிரடித் தகவல்களால், SIR நடவடிக்கைகளுக்குப் பிறகு நடந்த அனைத்துச் சட்டமன்றத் தேர்தல் முடிவுகளின் மீதும் பெரும் சந்தேகம் எழுந்துள்ளதாக மு.க.ஸ்டாலின் தெரிவித்துள்ளார். எனவே, தற்போதைய SIR பணிகளை உடனடியாக நிறுத்திட வேண்டும் என்றும், தேர்தல் ஆணையத்துக்குள் உண்மையில் என்ன நடந்தது என்பது குறித்து முறையான மற்றும் முழுமையான விசாரணை நடத்தப்பட்டு, இதற்குப் பொறுப்பானவர்கள் தகுந்த முறையில் தண்டிக்கப்பட வேண்டும் என்றும் அவர் வலியுறுத்தியுள்ளார்.