முட்டையை விட 4 மடங்கு புரோட்டீனா…? சோயா சங்ஸ் உண்மையிலேயே ஒரு மேஜிக் உணவா… அல்லது விளம்பர வேலையா..? சைவப் பிரியர்களும் உடற்பயிற்சி விரும்புபவர்களும் கட்டாயம் தெரிந்துகொள்ள வேண்டிய அந்த சீக்ரெட் இதோ..!!

உடலின் தசை வளர்ச்சி, திசுக்கள் சீரமைப்பு மற்றும் ஹார்மோன்கள் உருவாக்கத்திற்கு புரதம் அவசியமானது. சைவ உணவு உண்பவர்களுக்கும், உடற்பயிற்சி செய்பவர்களுக்கும் குறைந்த விலையில் அதிக புரதம் தரும் உணவாக சோயா சங்ஸ் திகழ்கிறது. 100 கிராம் உலர்ந்த சோயா சங்ஸில் சுமார் 52 கிராம் புரதம் உள்ளது. ஆனால், தண்ணீரில் ஊறவைத்து சமைத்த பிறகு அதன் எடை மூன்று மடங்கு அதிகரிப்பதால், 100 கிராம் சமைத்த சோயாவில் உண்மையில் 13 முதல் 15 கிராம் புரதமே கிடைக்கும். எனவே, உலர்ந்த நிலையின் சத்து அளவையும் சமைத்த உணவின் அளவையும் குழப்பிக் கொள்ளக் கூடாது.

ஒரு முட்டையில் 6 முதல் 7 கிராம் உயர்தர புரதத்துடன், உடல் எளிதில் உறிஞ்சும் 9 அத்தியாவசிய அமினோ அமிலங்கள், வைட்டமின் B12, கோலின் மற்றும் ஒமேகா-3 சத்துக்கள் உள்ளன. சோயா சங்ஸில் கொலஸ்ட்ரால் மற்றும் கொழுப்பு இல்லை என்றாலும், முட்டையில் உள்ள சில ஊட்டச்சத்துக்கள் இதில் அதே வடிவில் கிடைப்பதில்லை. இதனால் சோயா சங்ஸ் முட்டைக்கு முழுமையான மாற்றாகாது. மேலும், அதிக அளவில் சோயா உண்பதால் நார்ச்சத்து காரணமாக வயிற்று உப்புசம், வாயுத்தொல்லை ஏற்படலாம். நன்றாக ஊறவைத்து, கொதிக்க வைத்து சமைப்பது இதில் உள்ள ‘antinutrients’ அளவைக் குறைத்து செரிமானத்திற்கு உதவும்.

அதிக புரதம் பெற ஒரே உணவை மட்டும் நம்பியிருக்க வேண்டியதில்லை. சோயா சங்ஸை சரியான முறையில் சமைத்து, அளவுக்கு அதிகமாக இல்லாமல் சரியான அளவில் எடுத்துக் கொள்வது நல்லது. இதனுடன் பருப்பு வகைகள், பயறு, கொண்டைக்கடலை, பால் பொருட்கள், முட்டை, மீன் மற்றும் கோழி போன்ற பல்வேறு புரத ஆதாரங்களை உணவில் மாற்றி மாற்றிச் சேர்த்துக்கொள்வதே உடலுக்கு முழுமையான ஊட்டச்சத்தையும் சிறந்த ஆரோக்கியத்தையும் தரும்.