“திமுகவுக்கும் வெட்கமில்லை; நாதகவுக்கும் வெட்கமில்லை..” கிழித்து தொங்கவிட்ட அமைச்சர் வன்னி அரசு.. தமிழக அரசியலில் புதிய புயல்..!!

தாராபுரம் இடைத்தேர்தலில் நாம் தமிழர் கட்சி வேட்பாளர் கார்த்திகா மற்றும் அவரது கணவர் உட்பட ஆறு பேர் தவெக அரசால் நேற்று முன்தினம் கைது செய்யப்பட்ட சம்பவம் தமிழக அரசியலில் பெரும் பரபரப்பை ஏற்படுத்தியுள்ளது. இந்த கைது நடவடிக்கைக்கு திமுக தலைவர் மு.க.ஸ்டாலின், அதிமுக பொதுச்செயலாளர் எடப்பாடி பழனிசாமி, எதிர்க்கட்சி தலைவர் உதயநிதி ஸ்டாலின், பாஜக மாநில தலைவர் நயினார் நாகேந்திரன் உள்ளிட்ட பல்வேறு அரசியல் கட்சித் தலைவர்களும் தங்களது கடுமையான கண்டனங்களைத் தெரிவித்தனர். தவெக அரசின் இந்த எதேச்சாதிகாரப் போக்கை எதிர்த்து தங்களுக்கு ஆதரவளித்த அனைத்து அரசியல் கட்சிகள், ஜனநாயக இயக்கங்கள் மற்றும் சமூக அமைப்புகளின் தலைவர்களுக்கு நாம் தமிழர் கட்சியின் தலைமை ஒருங்கிணைப்பாளர் சீமான் தனது நன்றியினைத் தெரிவித்திருந்தார்.

இச்சூழ்நிலையில், இந்த அரசியல் நகர்வுகளை விமர்சித்து சமூகநீதித்துறை அமைச்சர் வன்னி அரசு தனது எக்ஸ் வலைதளப் பக்கத்தில் கடுமையான பதிவு ஒன்றை வெளியிட்டுள்ளார். அதில், ஆரியக் கடப்பாறை கொண்டு திராவிடக் கோட்டையை இடிப்பேன் என்று சவாலிட்டவர் சீமான் என்றும், இந்தியாவில் நடப்பதே ஆரிய-திராவிட யுத்தம் தான் என்று புரட்சியாளர் அம்பேத்கர் மற்றும் தந்தை பெரியார் ஆகியோர் விளக்கிய கோட்பாடுகளை எதிர்த்துப் பேசியவர் அவர் என்றும் சாடியுள்ளார். மேலும், திராவிடக் கோட்பாடுகளையும் சனாதன எதிர்ப்பையும் முன்னெடுத்த பேரறிஞர் அண்ணா மற்றும் முத்தமிழறிஞர் கலைஞர் ஆகியோரை மேடைகளில் அநாகரீகமாக விமர்சித்த சீமானின் இழிவான அரசியலை திமுக தற்போது மறந்திருக்கலாம் என்றும் அவர் குறிப்பிட்டுள்ளார்.

விடுதலைச் சிறுத்தைகள் கட்சியைப் பொறுத்தவரை தந்தை பெரியாரையும், புரட்சியாளர் அம்பேத்கரையும் ஏற்றுக்கொண்டவர்களை மட்டுமே ஏற்கும் என்றும், பார்ப்பனிய அடிமைகளை ஒருபோதும் ஏற்காது என்றும் வன்னி அரசு திட்டவட்டமாகத் தெரிவித்துள்ளார். கலைஞரின் அரசாணையால் கொண்டுவரப்பட்ட தமிழ்த்தாய் வாழ்த்துப் பாடலையே நிராகரித்த பிழைப்புவாதி சீமானின் கைது விவகாரத்தில், தற்போது திமுக ஆதரவுக்குரல் கொடுப்பதையும், அதனை நாம் தமிழர் கட்சி ஏற்பதையும் சுட்டிக்காட்டியுள்ள அவர், இப்போது திமுகவுக்கும் வெட்கமில்லை; நாம் தமிழர் கட்சிக்கும் வெட்கமில்லை என இரு கட்சிகளையும் ஒட்டுமொத்தமாக மிகக் கடுமையான வார்த்தைகளால் விமர்சித்துள்ளார்.