3 உயிரை அநியாயமா கொன்னுட்டு… “எங்க அப்பா பார்த்துப்பார்” அப்படின்னு பணத்திமிரில் பேசிய இளைஞர்… குடிபோதையில் காரை ஓட்டியதில் பயங்கரம்..!!

கொச்சியில் சுமார் 125 கி.மீ. வேகத்தில் அதிவேகமாக வந்த மினி கூப்பர் கார், ஸ்கூட்டியில் மோதிய கொடூர விபத்தில் 3 கல்லூரி மாணவர்கள் பரிதாபமாக உயிரிழந்தனர். இந்த விபத்து தொடர்பாக, மதுபோதையில் காரை ஓட்டி விபத்தை ஏற்படுத்திய 19 வயதான சுஹைல் சஞ்சீவ் என்பவரைப் போலீசார் அதிரடியாகக் கைது செய்துள்ளனர். பெற்றோர்கள் தங்களது பிள்ளைகளுக்குப் பிறந்தநாள் பரிசாக சொகுசு கார்களை வாங்கிக் கொடுப்பது, முறையான பக்குவமும் பொறுப்பும் இல்லாதபோது எவ்வளவு பெரிய விபரீதத்தை ஏற்படுத்தும் என்பதற்கு இந்த விபத்து ஒரு சான்றாக அமைந்துள்ளது.

விபத்தை ஏற்படுத்திய சஞ்சீவ், தனது பெற்றோர் பிறந்தநாள் பரிசாக வழங்கிய மினி கூப்பர் காரை அடியோடு கட்டுப்பாட்டை இழந்து தாறுமாறாக ஓட்டியுள்ளார். இந்த கோர விபத்தில் 3 பேர் சம்பவ இடத்திலேயே துடிதுடித்து இறந்த பிறகும், அவர் சிறிதும் குற்ற உணர்ச்சியோ, பயமோ இன்றி அலட்சியமாகச் செயல்பட்டுள்ளார். “இது ஏர்போர்ட் ரோடு.. இதில் வேகமாக ஓட்டுவதில் என்ன தவறு இருக்கிறது? இந்த விவகாரத்தை என் அப்பா பார்த்துக் கொள்வார்” என்று அவர் திமிராகப் பேசியதாகச் சம்பவத்தை நேரில் பார்த்தவர்கள் அதிர்ச்சியுடன் தெரிவித்துள்ளனர்.

செல்வாக்குமிக்கப் பின்னணி மற்றும் பணத்திமிர் காரணமாக, 3 உயிர்கள் பறிபோன பிறகும் “அப்பா பார்த்துப்பார்” என சஞ்சீவ் பேசிய இந்த அலட்சியமான பேச்சு பொதுமக்களிடையே கடும் கொந்தளிப்பையும் ஆத்திரத்தையும் ஏற்படுத்தியுள்ளது. அதிவேக வாகன ஓட்டமும், குடித்துவிட்டு வாகனம் ஓட்டும் அலட்சியப் போக்கும் அப்பாவி மாணவர்களின் வாழ்க்கையை எவ்வாறு பறித்துள்ளது என்பதை இந்த செய்தி காட்டுகிறது. இச்சம்பவம் குறித்து போலீசார் தீவிர விசாரணை மேற்கொண்டு வருகின்றனர்.