“விண்ணப்பித்த 3 நாளில் பிஎப் பணம் ரெடி…” EPFO அமைப்பின் ‘ஆட்டோ மோடு’ அதிரடி வசதி அறிமுகம்… தெரிந்து கொள்ள வேண்டிய தகவல்கள்…!!

வருங்கால வைப்பு நிதி (PF) கணக்கிலிருந்து அவசரக் கால மருத்துவத் தேவைகளுக்காகப் பணம் கோரி விண்ணப்பிக்கும் முறையை எளிதாக்கும் வகையில், மனிதத் தலையீடு இல்லாத ‘ஆட்டோ மோடு’ வசதியை இபிஎப்ஓ (EPFO) அறிமுகப்படுத்தியுள்ளது. இப்புதிய முறை மூலம் விண்ணப்பித்த 3 நாட்களுக்குள் கோரப்பட்ட தொகை நேரடியாகப் பயனாளரின் வங்கிக் கணக்கில் செலுத்தப்படும். மேலும், அவசர மருத்துவக் காரணங்களுக்கான முன்பண வரம்பு 50,000 ரூபாயிலிருந்து 1 லட்சம் ரூபாயாக அண்மையில் உயர்த்தப்பட்டுள்ளது. இதற்காகப் பயனாளர்கள் ‘படிவம் 31’-ஐப் பயன்படுத்தி, உமங் (UMANG) செயலி அல்லது அதிகாரப்பூர்வ இணையதளம் வழியாக இணைய வழியிலேயே தங்களின் தேவைகளுக்கான சரியான காரணத்தைக் குறிப்பிட்டுப் பணத்திற்கு விண்ணப்பிக்கலாம்.

இவ்வாறு விண்ணப்பிக்கும் முன்பாக, தங்களின் யுஏஎன் (UAN) எண்ணுடன் பான் கார்டு, வங்கிக் கணக்கு மற்றும் இதர அடையாள விபரங்கள் துல்லியமாக இணைக்கப்பட்டுள்ளதா என்பதை ஊழியர்கள் உறுதி செய்ய வேண்டும். அத்துடன் பதிவேற்றம் செய்யப்படும் ரத்து செய்யப்பட்ட காசோலை அல்லது வங்கிப் புத்தக நகலில் பெயர், கணக்கு எண் மற்றும் ஐஎப்எஸ்சி (IFSC) குறியீடு ஆகியவை தெளிவாக இருக்க வேண்டியது அவசியமாகும். மருத்துவத் தேவைகளுக்குக் குறைந்தபட்சச் சேவைக்கால நிபந்தனை ஏதும் இல்லை என்றாலும், திருமணம் மற்றும் வீடு கட்டுதல் போன்ற இதர காரணங்களுக்குக் குறிப்பிட்ட ஆண்டுகள் பணிபுரிந்திருக்க வேண்டும். இத்திட்டத்தின் கீழ் பெறப்படும் முன்பணத்தைத் திரும்பச் செலுத்தத் தேவையில்லை என்றாலும், அவசியமின்றி முன்கூட்டியே எடுப்பது எதிர்கால ஓய்வூதியச் சேமிப்பைக் குறைக்கும் என்பதை நினைவில் கொள்ள வேண்டும்.