ஏலியன்களா..? ட்ரோன்களா..? 50 வருடங்களுக்குப் பிறகு வானில் வட்டமிட்ட UFO.. இணையத்தை அலறவிடும் வைரல் வீடியோ..! பின்னணியில் உள்ள உண்மை என்ன..?!

ஈரானின் தலைநகரான தெஹ்ரானின் இரவு வானத்தில் பிரகாசமான விளக்குகள் கொண்ட அடையாளம் தெரியாத பறக்கும் பொருள் ஒன்று நகர்ந்து செல்வது போன்ற வீடியோக்கள் சமூக வலைதளங்களில் வைரலாகி, பெரும் விவாதத்தை கிளப்பியுள்ளன. செப்டம்பர் 19 அன்று தெஹ்ரானின் ஆசாதேகன் பகுதிக்கு அருகில் இந்தச் சம்பவம் படம்பிடிக்கப்பட்டதாகப் பகிரப்படும் பதிவுகள் கூறுகின்றன. இருண்ட வானத்தில் பல பிரகாசமான விளக்குகள் நகர்வது வீடியோவில் தெரிந்தாலும், அதன் அளவு, உயரம் அல்லது வேகத்தைக் துல்லியமாகக் கணிக்கும் வகையில் தெளிவான ஆதாரங்களோ அல்லது மெட்டாடேட்டாவோ இல்லை. சமூக வலைதளப் பயனர்கள் இது ட்ரோன்களாகவோ, விமானமாகவோ அல்லது எல்.இ.டி விளக்குகள் பொருத்தப்பட்ட பட்டமாகவோ இருக்கலாம் எனப் பலவிதமான கருத்துகளைத் தெரிவித்து வருகின்றனர்.

ஈரான், அமெரிக்கா மற்றும் மேற்கு ஆசிய நாடுகளுக்கு இடையே பதற்றம் அதிகரித்துள்ள சூழலில் இந்த வீடியோக்கள் வெளிவந்து அதிக கவனத்தைப் பெற்றுள்ளன. ஈரானின் ராணுவமும் அமெரிக்காவும் பரஸ்பரம் எச்சரிக்கைகளை விடுத்து வரும் நிலையில், அமெரிக்க வெளியுறவுத்துறை அப்பகுதியில் வான்வெளி மூடப்படலாம் என்றும் பயணக் கட்டுப்பாடுகள் விதிக்கப்படலாம் என்றும் எச்சரித்துள்ளது. இருப்பினும், இந்த ராணுவ அறிவிப்புகளுக்கும் வானத்தில் காணப்பட்ட வெளிச்சங்களுக்கும் இடையே ஏதேனும் தொடர்பு உள்ளதா என்பது குறித்து எந்தவித அதிகாரப்பூர்வ தகவலும் இல்லை. அதேபோல, ஈரானிய விமானப் படை அல்லது ராணுவ அதிகாரிகளும் இந்த வெளிச்சத்தைப் பற்றி இதுவரை எந்த விளக்கமும் அளிக்கவில்லை.

இந்தச் சம்பவம், சரியாக 50 ஆண்டுகளுக்கு முன்பு இதே செப்டம்பர் 19, 1976 இல் தெஹ்ரானில் நிகழ்ந்த புகழ்பெற்ற UFO சம்பவத்துடன் இணையத்தில் ஒப்பிடப்பட்டு பேசப்படுகிறது. 1976-இல் நடந்த சம்பவத்தின் போது பிரகாசமான பொருளை ஆய்வு செய்ய ஈரானின் F-4 போர் விமானங்கள் அனுப்பப்பட்டதாக அமெரிக்க பாதுகாப்புத் துறையின் ஆவணங்கள் உறுதிப்படுத்துகின்றன. ஆனால், தற்போதைய சம்பவத்திற்கும் 1976 சம்பவத்திற்கும் இடையே எந்த ஆதாரப்பூர்வ தொடர்பும் இல்லை. எனவே, தற்போதைய இந்த வீடியோக்களின் உண்மைத்தன்மையை உறுதிப்படுத்தவோ அல்லது அது என்னவென்று கண்டறியவோ ஈரானிய அதிகாரிகளின் அதிகாரப்பூர்வ அறிவிப்பு அல்லது அசல் வீடியோ தரவுகள் தேவைப்படுகின்றன.