காலையிலேயே பரபரப்பு.. தவெக ஜெயிக்கவே கூடாது… மீண்டும் அதுதான் நடக்கும்.. பெ.சண்முகம் அதிரடி..!!

மதுராந்தகம் இடைத்தேர்தலில் தமிழக வெற்றிக் கழகத்தின் வேட்பாளர் எக்காரணம் கொண்டும் வெற்றி பெற்றுவிடக் கூடாது என்று மார்க்சிஸ்ட் கம்யூனிஸ்ட் கட்சியின் மாநிலச் செயலாளர் பெ. சண்முகம் தெரிவித்துள்ளார். மதுராந்தகம் தொகுதிக்கு உட்பட்ட மேலவலம்பேட்டை பகுதியில் சிபிஎம் வேட்பாளர் சுகந்தியை ஆதரித்து தீவிர தேர்தல் பரப்புரையில் ஈடுபட்ட அவர், தவெக வேட்பாளருக்கு எதிராக கடுமையான விமர்சனங்களை முன்வைத்தார்.

பரப்புரையின் போது பேசிய பெ. சண்முகம், தவெக வேட்பாளர் தற்போது வெற்றி பெற்றாலும், தனது சொந்த அரசியல் ஆதாயத்திற்காக எதிர்காலத்தில் மீண்டும் தனது பதவியை ராஜினாமா செய்துவிடுவார் என்று குற்றம் சாட்டினார். தவெகவினர் மக்கள் மத்தியில் நம்பகத்தன்மை இல்லாத அரசியலை முன்னெடுப்பதாக அவர் சாடினார். மேலும், சட்டமன்ற இடைத்தேர்தல் களம் என்பது மக்கள் நலனுக்கானதாக இருக்க வேண்டுமே தவிர, சுயநல அரசியலுக்கானதாக இருக்கக் கூடாது என்பதை அவர் தனது பேச்சில் வலியுறுத்தினார்.

திமுக மற்றும் அதிமுக ஆகிய இரு கட்சிகளும் இணைந்து மாநிலத்தில் ஆட்சியமைக்க திட்டமிட்டதாகவும், அதனைத் தடுப்பதற்காகவே தாங்கள் ராஜினாமா செய்தோம் என்றும் தவெக தரப்பில் தற்போது ஒரு புதிய கதை கூறப்பட்டு வருவதாக சண்முகம் சாடினார். தவெகவின் இந்த விளக்கங்கள் அனைத்தும் மக்களை ஏமாற்றுவதற்காக ஜோடிக்கப்பட்ட கதைகள் என்றும், இத்தகைய அரசியல் நாடகங்களை மக்கள் உணர்ந்து தவெக வேட்பாளரைத் தோற்கடிக்க வேண்டும் என்றும் அவர் வாக்காளர்களைக் கேட்டுக்கொண்டார்.