அதிர்ச்சி..! பிரபல எவரெஸ்ட் சீரகத்தூளில் நச்சுப் பூச்சிக்கொல்லி கலப்பு… FSSAI உரிமம் அதிரடி ரத்து..!

உணவுப் பாதுகாப்பு மற்றும் தர நிர்ணய ஆணையம் (FSSAI), எவரெஸ்ட் நிறுவனத்தின் குறிப்பிட்ட ஒரு பேட்ச் சீரகத்தூளை சந்தையிலிருந்து உடனடியாகத் திரும்பப் பெற உத்தரவிட்டுள்ளது. ஆய்வகத்தில் நடத்தப்பட்ட தரப் பரிசோதனையில், இந்தச் சீரகத்தூள் பாக்கெட்டுகளில் அனுமதிக்கப்பட்ட அளவை விட மிக அதிகப்படியான பூச்சிக்கொல்லி மருந்து எச்சங்கள் இருப்பது கண்டறியப்பட்டது. இதனால் இந்தத் தயாரிப்பு மனிதர்கள் பயன்படுத்துவதற்குப் ‘பாதுகாப்பற்றது’ என்று அதிகாரிகள் அதிகாரப்பூர்வமாக உறுதி செய்துள்ளனர்.

இந்த அதிர்ச்சித் தகவலைத் தொடர்ந்து, நுகர்வோரின் ஆரோக்கியத்தைப் பாதுகாக்கும் நோக்கில் FSSAI அதிரடி நடவடிக்கை ஒன்றை எடுத்துள்ளது. இந்தச் சீரகத்தூள் தயாரிப்பில் ஈடுபட்ட ‘கிரியேட்டிவ் பேக்கர்ஸ் அண்ட் கான்ஃபெக்ஷனர்ஸ்’ என்ற நிறுவனத்தின் உணவுத் தயாரிப்பு உரிமத்தை FSSAI உடனடியாக ரத்து செய்துள்ளது. மேலும், பாதிக்கப்பட்ட அந்த குறிப்பிட்ட பேட்ச் தயாரிப்புகள் எவையும் சந்தையிலோ அல்லது பொதுமக்களிடமோ புழக்கத்தில் இல்லை என்பதை உறுதி செய்யுமாறு அதிகாரிகளுக்கு அறிவுறுத்தப்பட்டுள்ளது.

சந்தையில் பிரபலமான ஒரு பிராண்டின் மசாலாப் பொருளில் நச்சுத்தன்மை வாய்ந்த பூச்சிக்கொல்லி எச்சங்கள் கண்டறியப்பட்டு, உரிமம் ரத்து செய்யப்பட்டுள்ள இந்தச் சம்பவம் நாடு முழுவதும் பெரும் பரபரப்பை ஏற்படுத்தியுள்ளது. சமையலில் தினசரி பயன்படுத்தப்படும் மசாலாப் பொருட்களின் தரக் கட்டுப்பாடு குறித்தும், நுகர்வோர் பாதுகாப்பு குறித்தும் இந்த நடவடிக்கை தற்பொழுது விழிப்புணர்வை ஏற்படுத்தியுள்ளது.