தமிழக சட்டத்துறைக்குப் பேரிழப்பு..! முன்னாள் தலைமை வழக்கறிஞர் டி.ஆர். ராஜகோபாலன் காலமானார்… ஸ்டாலின் உருக்கமான இரங்கல்..!!

தமிழ்நாடு அரசின் முன்னாள் தலைமை வழக்கறிஞர் டி.ஆர். ராஜகோபாலன் வயது மூப்பு காரணமாகக் காலமானார். சட்டத்துறையில் நீண்ட நெடிய அனுபவம் கொண்ட மூத்த வழக்கறிஞரான இவரது மறைவு, தமிழக நீதித்துறை மற்றும் வழக்கறிஞர்கள் வட்டாரத்தில் பெரும் சோகத்தை ஏற்படுத்தியுள்ளது.

அவரது மறைவுக்கு மு.க. ஸ்டாலின் தனது ஆழ்ந்த இரங்கலைத் தெரிவித்துள்ளார். இதுகுறித்து அவர் வெளியிட்டுள்ள இரங்கல் செய்தியில், 1996 முதல் 2001-ம் ஆண்டு வரையிலான காலகட்டத்தில் முன்னாள் முதலமைச்சர் கருணாநிதியால் கூடுதல் தலைமை வழக்கறிஞராக நியமிக்கப்பட்டு, அரசுத் தரப்பு வழக்குகளில் டி.ஆர். ராஜகோபாலன் மிகச் சிறப்பாகப் பணியாற்றிய பெருமைக்குரியவர் என்பதை நினைவுகூர்ந்துள்ளார்.

பல்வேறு முக்கிய வழக்குகளில் திறம்பட வாதாடி அரசுக்குப் பெருமை சேர்த்தவர் டி.ஆர். ராஜகோபாலன் என முதலமைச்சர் புகழாரம் சூட்டியுள்ளார். நீண்ட சட்ட அனுபவமும், நேர்மையும் கொண்ட அவரது மறைவு ஒட்டுமொத்த சட்டத்துறைக்கும் ஈடுசெய்ய முடியாத பேரிழப்பாகும் என மு.க. ஸ்டாலின் தனது இரங்கல் செய்தியில் குறிப்பிட்டுள்ளார்.