CRIME
“பகீர்.. காதல் வலை, போதைப்பொருள், பாகிஸ்தான் தொடர்பு…” ராஜஸ்தான் ரயில் குண்டுவெடிப்பில் சிக்கிய பஞ்சாப் பெண்ணின் அதிர்ச்சிப் பின்னணி..!!
ராஜஸ்தான் ரயில் தண்டவாளத்தில் நிகழ்ந்த வெடிகுண்டு தாக்குதல் வழக்கில், பாகிஸ்தான் பயங்கரவாத மற்றும் போதைப்பொருள் கடத்தல் கும்பலுடன் தொடர்புடைய பஞ்சாப் பெண்ணான மகக்தீப் கவுர் மற்றும் அவரது காதலன் தேவிந்தர் சிங் ஆகிய இருவரைக் காவல்துறையினர் கைது செய்துள்ளனர். பஞ்சாபின் குர்தாஸ்பூர் மாவட்டத்தைச் சேர்ந்த 12-ஆம் வகுப்பு படித்த மகக்தீப் கவுருக்கு, தனது முன்னாள் கணவர் கரண் தீப் சிங் மற்றும் உறவினர் மூலமாக பாகிஸ்தானைச் சேர்ந்த ‘ஷா’ என்ற கடத்தல்காரனுடன் தொடர்பு ஏற்பட்டுள்ளது. பணத்திற்கு ஆசைப்பட்டு பாகிஸ்தான் கும்பலுக்காக வேலை செய்யத் தொடங்கிய மகக்தீப், மூன்று மாதங்களுக்கு முன்பு தனக்கு அறிமுகமான தேவிந்தர் சிங்கிடம் திருமணம் செய்து கொள்வதாக ஆசை வார்த்தை கூறி இந்தச் சதித்திட்டத்தில் இணைத்துள்ளார்.
ரூ.1 லட்சம் பணத்திற்காக ராஜஸ்தான் ரயில் தண்டவாளத்தில் வெடிகுண்டு வைக்க ஒப்புக்கொண்ட இவர்கள் இருவரும், நவம்பர் 3-ஆம் தேதி குண்டுவெடிப்பை நிகழ்த்துவதற்கு முன்பாக மூன்று முறை ராஜஸ்தானுக்குப் பயணம் மேற்கொண்டுள்ளனர். முதலில் அக்டோபர் 3-4 தேதிகளில் ஸ்ரீகங்காநகர் சென்று ஷா வழங்கிய வெடிபொருட்களைத் தண்டவாளத்தில் வைத்தபோது அது வெடிக்காமல் போனதால், பின்னர் அக்டோபர் 12 மற்றும் அக்டோபர் 30-க்குப் பிறகும் அங்குச் சென்று அதே விடுதியில் தங்கி, விடுதி உரிமையாளரின் இருசக்கர வாகனத்தைப் பயன்படுத்தி வெடிகுண்டைப் பொருத்தி வெடிக்கச் செய்துள்ளனர். இதற்கிடையே, மகக்தீப்பின் முன்னாள் கணவர் மற்றும் சகோதரர் ஆகியோர் ஏற்கனவே போதைப்பொருள் மற்றும் ஆயுதக் கடத்தல் வழக்குகளில் சிறையில் உள்ளதும் விசாரணையில் தெரியவந்துள்ளது.
ராஜஸ்தான் பயங்கரவாதத் தடுப்புப் படை மற்றும் பஞ்சாப் காவல்துறையின் உளவுத்துறையினர் இணைந்து நடத்திய அதிரடி நடவடிக்கையில், குர்தாஸ்பூரின் கலனூர் பகுதியில் பதுங்கியிருந்த இருவரும் இரண்டு கைத்துப்பாக்கிகளுடன் கைது செய்யப்பட்டனர். காதல் வலை வீசியும், பணத்தாசை காட்டியும் இந்தியப் பெண்களைப் பாகிஸ்தான் கும்பல் பயங்கரவாதச் செயல்களுக்குப் பயன்படுத்தும் புதிய போக்கு குறித்துப் பாதுகாப்பு அமைப்புகள் தீவிரமாக விசாரித்து வருகின்றன. மேலும், இந்தக் கடத்தல் கும்பலின் பின்னணியில் உள்ள மற்ற நபர்கள் மற்றும் எல்லை தாண்டி வெடிபொருட்கள் கடத்தி வரப்பட்ட விதம் குறித்தும் போலீசார் தீவிர விசாரணை நடத்தி வருகின்றனர்
