“எம்.ஜி.ஆருக்குப் பின் முதலமைச்சர் விஜய்” தமிழகத்தில் வீட்டுக்கு வீடு ஒரு விஜய் – சபாநாயகர் நெகிழ்ச்சி..!!

தமிழக முதலமைச்சர் விஜய் மீது மக்கள் வைத்துள்ள பாசம், மறைந்த முன்னாள் முதலமைச்சர் எம்.ஜி.ஆர். மீது காட்டிய அன்பைப் போன்றது என்று தமிழக சட்டமன்ற சபாநாயகர் ஜே.சி.டி. பிரபாகர் நெகிழ்ச்சியுடன் பாராட்டியுள்ளார். அரியலூர் மாவட்டம் குலமாணிக்கம் கிராமத்தில் தனக்கு நடத்தப்பட்ட பாராட்டு விழாவில் பேசிய அவர், தேர்தலுக்கு முன்பு விஜய் சந்தித்த கஷ்டங்கள் அனைத்தையும் மக்கள் நன்கு அறிவர் எனக் குறிப்பிட்டார். தேர்தல் முடிவுகள் வெளியான பிறகே தமிழகத்தில் குடும்பம் குடும்பமாக மக்கள் விஜய்யின் பக்கமே நின்றுள்ளது வெளிச்சத்திற்கு வந்துள்ளது என்று அவர் தெரிவித்துள்ளார்.

முதலமைச்சர் விஜய் எவ்விதத் தன்னலமும் இல்லாதவர் என்றும், தனது குடும்பத்திற்காகச் சொத்து சேர்க்காத ஒரு தூய்மையான தலைவராக விளங்குகிறார் என்றும் சபாநாயகர் புகழ்ந்துரைத்தார். தன்னைச் சுற்றி இருப்பவர்கள் யாரும் தவறு செய்துவிடக் கூடாது என்பதில் அவர் எப்போதும் கண்ணுங்கருத்துமாக இருக்கிறார். தேர்தலுக்கு முன்பு அளித்த வாக்குறுதியின்படியே, தற்பொழுது கூட்டணி மற்றும் பிற கட்சிகளுக்கும் ஆட்சியில் அதிகாரம் தந்து அவர் சிறந்த முன்மாதிரியாகத் திகழ்கிறார் என்றும் பிரபாகர் சுட்டிக்காட்டினார்.

முந்தைய ஆட்சியாளர்கள் தமிழகத்தில் சுமார் 10 லட்சம் கோடி ரூபாய்க்கும் மேல் பெரும் கடனை வைத்துவிட்டுச் சென்றுள்ளனர் என்று கடந்த அரசை அவர் கடுமையாக விமர்சித்தார். இந்த இக்கட்டான சூழலில், தமிழகத்தின் நிதிநிலைமை சீரானதும் தனது தேர்தல் வாக்குறுதிகள் அனைத்தையும் முதலமைச்சர் விஜய் ஒவ்வொன்றாக நிச்சயம் நிறைவேற்றுவார் என்று சபாநாயகர் ஜே.சி.டி. பிரபாகர் உறுதியளித்துப் பேசினார்.