“1 ரூபாய் செலவு… ஆனா 1 லட்சம் ரூபாய் விளம்பரம்..!” த.வெ.க. அரசை அதிரடியாக வெளுத்து வாங்கிய எடப்பாடி பழனிசாமி.. அனல் பறக்கும் அரசியல் களம்..!!

சேலத்தில் நடைபெற்ற அ.தி.மு.க. பொதுக்கூட்டத்தில் பேசிய கட்சியின் பொதுச்செயலாளர் எடப்பாடி பழனிசாமி, தற்போதைய த.வெ.க. அரசு ஒரு ரூபாய் மட்டுமே செலவு செய்துவிட்டு ஒரு லட்சம் ரூபாய்க்கு விளம்பரம் செய்வதாகக் கடுமையாகக் குற்றம் சாட்டியுள்ளார். தற்போதைய ஆட்சியாளர்கள் ஒரு தற்செயலான விபத்தின் மூலம் ஆட்சிக்கு வந்துவிட்டு, என்ன பேசுகிறோம் என்று தெரியாமல் தலைகால் புரியாமல் பேசிக் கொண்டிருக்கிறார்கள் என்று அவர் விமர்சித்தார். மேலும், அ.தி.மு.க. ஆட்சிக் காலத்தில் ஏழைப் பெண்களின் திருமணத்திற்காகக் கொண்டு வரப்பட்ட ‘தாலிக்கு தங்கம்’ போன்ற சிறந்த மக்கள் நலத் திட்டங்களுக்கு, இந்த அரசு வெறும் பெயர்களை மட்டுமே மாற்றி தங்களின் திட்டங்களைப் போலக் காட்டி மகிழ்வதாகவும், ஆனால் இன்னும் அந்தத் திட்டங்களைச் சரியாகத் தொடங்கவில்லை என்றும் அவர் சாடினார்.

தொடர்ந்து பேசிய அவர், ஏழைகளுக்கு ஒரு கிராம் தங்கம் வழங்கும் ‘தாய்மாமன் தங்க மோதிரம்’ திட்டத்தைச் செயல்படுத்துவதில் எவ்விதத் தவறும் இல்லை என்றும், ஆனால் அதற்கு இந்த அரசு கொடுக்கின்ற விளம்பர வடிவமைப்பு மிக அதிகம் என்றும் குறிப்பிட்டார். அ.தி.மு.க. ஆட்சியில் கொண்டு வரப்பட்ட திட்டங்களுக்கு இதுபோன்று ஒருபோதும் விளம்பரம் செய்ததில்லை என்று சுட்டிக்காட்டிய எடப்பாடி பழனிசாமி, த.வெ.க. கட்சியின் மூலதனமே வெறும் ‘ரீல்ஸ்’ (Reels) வீடியோக்கள் மட்டும்தான் என்றும், அதை மட்டுமே கையில் வைத்துக்கொண்டு அவர்கள் ஆட்சிக்கு வந்துவிட்டார்கள் என்றும் தனது உரையில் அனல் பறக்க விமர்சித்துள்ளார்.