“தாத்தாவே இப்படி ஒரு மிருகமா மாறலாமா..?” 14 வயது பேத்திக்கு நேர்ந்த கொடூரம்.. 60 வயது முதியவருக்குக் கிடைத்த அதிரடித் தீர்ப்பு..!!

திருச்சி மாவட்டத்தைச் சேர்ந்த 60 வயது முதியவர் ஒருவர், கடந்த ஆண்டு மே மாதம் தனது 14 வயது பேத்தியைப் பாலியல் வன்கொடுமை செய்த வழக்கில், திருச்சி மகளிர் நீதிமன்றம் அவருக்கு வாழ்நாள் சிறைத் தண்டனை விதித்து அதிரடித் தீர்ப்பளித்துள்ளது. இக்கொடூரச் சம்பவம் குறித்துத் தகவலறிந்த சிறுமியின் தாய், ஜீயபுரம் அனைத்து மகளிர் காவல் நிலையத்தில் உடனடியாகப் புகார் அளித்தார். அதன் அடிப்படையில், போலீஸார் போக்சோ சட்டத்தின் கீழ் வழக்குப் பதிவு செய்து அந்த முதியவரைக் கைது செய்து சிறையில் அடைத்தனர்.

இந்த வழக்கின் இறுதி விசாரணை திருச்சி மகளிர் நீதிமன்றத்தில் நீதிபதி சண்முகபிரியா முன்னிலையில் நடைபெற்றது; அரசுத் தரப்பில் வழக்கறிஞர் சுமதி ஆஜராகி வாதாடினார். அனைத்துத் தரப்பு சாட்சியங்கள் மற்றும் ஆதாரங்கள் முறையாக ஆராயப்பட்டதைத் தொடர்ந்து, முதியவருக்கு வாழ்நாள் சிறைத் தண்டனையுடன், ரூ.5,000 அபராதமும் விதித்து நீதிபதி உத்தரவிட்டார். இந்த வழக்கில் துரிதமாகவும் சிறப்பாகவும் செயல்பட்ட காவல் ஆய்வாளர் ஜெயசித்ரா மற்றும் பெண் போலீஸ் நித்தியா ஆகியோரைத் திருச்சி மாவட்டக் காவல் கண்காணிப்பாளர் டோங்கரே பிரவீன் உமேஷ் நேரில் அழைத்துத் தனது பாராட்டுகளைத் தெரிவித்தார்.