மும்பையில் பயங்கரம்… அடுத்தடுத்து 2 பைக்குகள் மீது மோதிவிட்டு..! பறந்த ஹரியானா தார் கார்… அதிரவைக்கும் வைரல் வீடியோ..!ஓட்டுநருக்கு போலீஸ் வலைவீச்சு..!!

மும்பையின் மீரா ரோடு பகுதியில் உள்ள ஒரு பரபரப்பான சாலையில், கருப்பு நிற மஹிந்திரா தார் கார் ஒன்று மிக அதிவேகமாகவும், அஜாக்கிரதையாகவும் இயக்கப்பட்டது. அப்போது அந்த கார், தனக்கு முன்னால் சென்ற ஒரு மோட்டார் சைக்கிள் மீது பலமாக மோதியது. இதில் பைக்கில் இருந்த இருவர் தூக்கி வீசப்பட்டு சாலையில் விழுந்தனர். ஆனால், காரை ஓட்டி வந்த நபர் சிறிதும் மனிதநேயமின்றி, வண்டியை நிறுத்தாமல் வேகமாக முன்னோக்கி இயக்கினார். அவ்வாறு தப்பிச்செல்ல முயன்றபோது, அடுத்த சில நொடிகளில் மற்றொரு இருசக்கர வாகனத்தின் மீதும் அந்த தார் கார் மோதிவிட்டு நிற்காமல் அதிவேகமாக தப்பிச் சென்றது. இந்த ஒட்டுமொத்த கொடூர சம்பவமும் அங்கிருந்த ஒருவரால் வீடியோ எடுக்கப்பட்டு, சமூக வலைத்தளங்களில் வைரலாகி பொதுமக்களிடையே பெரும் கொந்தளிப்பை ஏற்படுத்தியது.

விபத்தை ஏற்படுத்திய அந்த மஹிந்திரா தார் கார், ஹரியானா மாநிலத்தின் பதிவு எண்ணைக் (HR 98 X 5101) கொண்டது என்பது அந்த வீடியோ பதிவின் மூலம் தெரியவந்தது. “அவர் தனது தார் காரை மும்பைக்குக் கொண்டு வந்தார், ஆனால் தனது ஹரியானா ஸ்டைல் முரட்டுத்தனத்தை அங்கேயே விட்டுவர மறுத்துவிட்டார்” என்ற விமர்சனங்களுடன் இந்த வீடியோ இணையத்தில் பரவியது. சாலையில் பிற பயணிகளின் பாதுகாப்பைப் பற்றி கவலைப்படாமல், அடுத்தடுத்து இரண்டு பைக்குகளை மோதிவிட்டு தப்பியோடிய அந்த ஓட்டுநரின் அநாகரிகமான மற்றும் ஆபத்தான செயல் சமூக ஊடகப் பயனர்களிடம் கடுமையான கண்டனங்களைப் பெற்றுள்ளது.

இந்த வைரல் வீடியோ மும்பை மீரா பயந்தர் வசாய் விரார் காவல்துறையின் கவனத்திற்குச் சென்ற உடனே அவர்கள் தீவிர நடவடிக்கை எடுத்துள்ளனர். காஷிகாவ்ன் காவல் நிலையத்தில் அடையாளம் தெரியாத அந்த தார் கார் ஓட்டுநருக்கு எதிராக FIR பதிவு செய்யப்பட்டுள்ளது. புதிய சட்டமான பாரதிய நியாய சன்ஹிதா பிரிவு 281-ன் கீழும், மோட்டார் வாகனச் சட்டம் பிரிவுகள் 184 மற்றும் 187-ன் கீழும் வழக்குகள் பதியப்பட்டுள்ளன. தப்பியோடிய அந்த ஓட்டுநரை அடையாளம் கண்டு, கைது செய்வதற்கான தீவிர தேடுதல் வேட்டையில் போலீசார் தற்போது ஈடுபட்டுள்ளனர்.