“இபிஎஸ்-க்கு சொந்தமா ஒரு ஓட்டு கூட கிடையாது… சீக்கிரமே திமுகவோட கூட்டணி சேருவார்…” போட்டுடைத்த ஆதவ் அர்ஜுனா..!!

மதுராந்தகம் மற்றும் தாராபுரம் இடைத்தேர்தல் வெற்றியைத் தொடர்ந்து செய்தியாளர்களைச் சந்தித்த தமிழக வெற்றிக் கழகத்தின் அமைச்சர் ஆதவ் அர்ஜுனா, அதிமுகவின் 60 சதவீத வாக்குகள் தவெகவிற்கு வந்துள்ளதாகத் தெரிவித்தார். திமுகவும் அதிமுகவும் இணைந்து தவெகவை வீழ்த்த நினைக்கின்றன என்றும், எடப்பாடி பழனிசாமியின் பொய் பிரச்சாரங்களை அதிமுக தொண்டர்கள் புரிந்து கொண்டதால்தான் தவெக வெற்றி பெற்றுள்ளதாகவும் அவர் குறிப்பிட்டார். மேலும், அதிமுகவின் ஒட்டுமொத்த கட்டமைப்பையும் வரவேற்பதாகவும், உண்மையான எம்.ஜி.ஆர் மற்றும் ஜெயலலிதா விசுவாசிகள் எடப்பாடி பழனிசாமியை விடுத்து தவெகவை நோக்கி வர ஆரம்பித்துவிட்டதாகவும் அவர் கூறினார்.

1972-ல் எம்.ஜி.ஆர் கட்சி தொடங்கியபோது காங்கிரஸின் 40 சதவீத வாக்கு வங்கி எப்படி எம்.ஜி.ஆரிடம் சென்றதோ, அதே வரலாறு இப்போது மீண்டும் நடந்து கொண்டிருப்பதாக ஆதவ் அர்ஜுனா தெரிவித்தார். அப்போது பக்தவத்சலம் தலைமையால் காங்கிரஸ் வீழ்ந்தது போல, தற்போது எடப்பாடி பழனிசாமியின் தலைமையால் அதிமுக வீழ்ந்து வருவதாகவும், எம்.ஜி.ஆரையும் ஜெயலலிதாவையும் தவெக தலைவர் விஜய்யிடம் தொண்டர்கள் பார்ப்பதாகவும் அவர் தெரிவித்தார். இபிஎஸ் அவர்களுக்கு சொந்தமாக ஓட்டு கிடையாது என்றும், இரட்டை இலை சின்னத்தினால்தான் இதுவரை வாக்குகள் இருந்தன என்றும் அவர் விமர்சித்தார்.

அதிமுக தொடங்கியதே திமுகவை எதிர்த்துத்தான் என்று சுட்டிக்காட்டிய அவர், விரைவில் பழனிசாமியின் அதிமுக திமுகவுடன் சேர்ந்துவிடும் என்றும், அப்போது அதிமுகவின் முழு வாக்கு வங்கியும் தவெக பக்கம் திரும்பிவிடும் என்றும் கூறினார். தாராபுரத்தில் தோற்றுவிடுவோம் என்று சொல்லப்பட்ட இடத்திலும், ஓட்டுக்கு பணம் கொடுக்காத அமைச்சர்களையும் கட்சியையும் தங்களின் முதலமைச்சர் உருவாக்கியிருப்பதாகவும், தாங்கள் எப்பொழுதும் நேர்மையாக இருப்போம் என்றும் அவர் பெருமிதத்துடன் தெரிவித்தார்.