“தி.மு.க கார் வழங்கினால் மட்டும் நியாயமா?” கலைஞர் கருணாநிதி ஆட்சியில 300 யூனியன் சேர்மன்களுக்கு கார் கொடுத்தாரே அப்போ யாரும் கேட்கல… அமைச்சர் ஷாஜகான் அதிரடி கேள்வி..!!

தமிழ்நாடு சட்டமன்றப் பேரவை விவாதத்தின்போது, எம்.எல்.ஏ-க்களுக்குப் புதிய கார்கள் வழங்குவது குறித்து எதிர்க்கட்சிகள் எழுப்பிய விமர்சனங்களுக்குப் போக்குவரத்துத்துறை அமைச்சர் ஷாஜகான் அவையில் ஆக்ரோஷமாகப் பதிலடி கொடுத்துள்ளார். தற்போதைய அரசின் நிதிநிலைமையைக் காரணம் காட்டி, கார்கள் வழங்கும் திட்டத்திற்கு எதிர்க்கட்சியினர் ஆட்சேபனை தெரிவித்த நிலையில், கடந்த கால வரலாற்று நிகழ்வுகளைச் சுட்டிக்காட்டி அமைச்சர் இந்த விளக்கத்தை அளித்தார்.

அமைச்சர் ஷாஜகான் பேசுகையில், “பல ஆண்டுகளுக்கு முன்பு மறைந்த முன்னாள் முதலமைச்சர் கருணாநிதி அவர்களின் ஆட்சிக்காலத்தில், 300-க்கும் அதிகமான யூனியன் சேர்மன்களுக்குப் புதிய கார்கள் வழங்கப்பட்டன. அப்போதும் தமிழகத்தின் நிதிநிலைமை தற்போதைய சூழலைப் போலச் சரியாக இல்லாமல் தான் இருந்தது. அப்போதெல்லாம் வாய் திறக்காமல் நியாயப்படுத்தியவர்கள், இப்போது மக்கள் பிரதிநிதிகளான எம்.எல்.ஏ-க்களுக்குக் கார்கள் வழங்குவதைக் கேள்வி எழுப்புவது எந்த விதத்தில் நியாயம்?” என்று காரசாரமாகக் கேள்வி எழுப்பினார்.

திமுகவினர் கார் வழங்கினால் மட்டும் நியாயமா? என்று சாடிய அமைச்சர், மக்கள் பணிக்காகச் சுழன்று வேலை செய்யும் சட்டமன்ற உறுப்பினர்களின் அத்தியாவசியத் தேவையை உணர்ந்தே இத்திட்டம் செயல்படுத்தப்படுவதாகத் திட்டவட்டமாகக் கூறினார். அமைச்சரின் இந்த அதிரடியான கடந்த கால ஒப்பீட்டுப் பேச்சு, அவையில் இருந்த எதிர்க்கட்சி உறுப்பினர்களை வாயடைக்கச் செய்ததுடன் பேரவை களத்தில் பெரும் பரபரப்பை ஏற்படுத்தியுள்ளது.