“வாயை மூடு.. நான் தான் உனக்கு பாஸ்…” இணையவழி கூட்டத்தில் பெண் அதிகாரியை அலறவிட்ட IAS அதிகாரி..! வைரலாகும் ஷாக்கிங் வீடியோ..!!

ஜம்மு-காஷ்மீர் தொழிலாளர் மற்றும் வேலைவாய்ப்புத் துறையின் செயலாளரான குமார் ராஜீவ் ரஞ்சன், இணையவழியில் நடைபெற்ற பணி மறுஆய்வுக் கூட்டத்தில் பங்கேற்றார். அப்போது, வேலைவாய்ப்புத் துறையின் உதவி இயக்குநரும் ஜம்மு-காஷ்மீர் நிர்வாக சேவை அதிகாரியுமான பீனிஷ் வானி என்பவரிடம் அவர் மிகவும் அவமரியாதையான மற்றும் தகாத வார்த்தைகளைப் பயன்படுத்திப் பேசியுள்ளார். கால் முறிவு காரணமாக வீட்டிலிருந்தபடியே பணியில் இணைந்த பெண் அதிகாரியிடம், அவர் கருத்து தெரிவிக்க முயன்றபோது “வாயை மூடு” என்றும், “I am your boss” எனக் கூறித் திட்டியதாகவும் அந்த காணொளியில் பதிவாகியுள்ளது.

இந்த உரையாடலின் காணொளி சமூக வலைதளங்களில் வேகமாகப் பரவி, பொதுமக்களிடையேயும் அரசியல் தலைவர்களிடையேயும் கடும் கொந்தளிப்பை ஏற்படுத்தியுள்ளது. மூத்த அதிகாரி ஒருவர் தன் அதிகாரத்தைப் பயன்படுத்தி ஜூனியர் பெண் அதிகாரியை அச்சுறுத்தும் வகையில் நடந்துகொண்டதற்குப் பலரும் கண்டனம் தெரிவித்து வருகின்றனர். அத்துடன், இத்தகைய அவமரியாதையான நடத்தையில் ஈடுபட்ட ஐஏஎஸ் அதிகாரி மீது உடனடி சஸ்பெண்ட் நடவடிக்கை மற்றும் தகுந்த விசாரணை எடுக்க வேண்டும் என்ற கோரிக்கையும் வலுத்து வருகிறது.

இச்சம்பவம் குறித்து பாதிக்கப்பட்ட பெண் அதிகாரி பீனிஷ் வானி தெரிவிக்கையில், ஒரு பெண்ணின் கண்ணியம் பாதுகாக்கப்பட வேண்டும் என்றும் யாரும் தங்களை இவ்வாறு நடத்த முடியாது என்றும் கூறியுள்ளார். இதனிடையே, தொழிலாளர் மற்றும் வேலைவாய்ப்புத் துறை வெளியிட்ட விளக்கத்தில், இணையத்தில் பரவி வரும் காணொளி முழுமையற்றதாகத் திருத்தப்பட்டிருக்கலாம் எனக் குறிப்பிட்டுள்ளதுடன், இந்த விவகாரம் அரசு விதிமுறைகளின்படி உரிய விசாரணைக்கு உட்படுத்தப்பட்டுத் தகுந்த நடவடிக்கை எடுக்கப்படும் எனக் தெரிவித்துள்ளது.