“என் அம்மா தான் சூனியக்காரி..” தாயை வீட்டிற்குள் இழுத்துச் சென்று மகன் செய்த கொடூர காரியம்.. குலை நடுங்க வைக்கும் பின்னணி..!!

தெலங்கானா மாநிலம் மேடக் மாவட்டம், டெக்மல் மண்டலத்திற்கு உட்பட்ட ஏலுபேட்டா கிராமத்தில், மூடநம்பிக்கையின் காரணமாகப் பெற்ற தாயையே மகன் தீவைத்து எரித்துக் கொன்ற படுபயங்கரச் சம்பவம் வெளிச்சத்திற்கு வந்துள்ளது. இத்துயரச் சம்பவத்தில் 48 வயதான கர்ரே சாய்வா என்ற பெண்மணி சம்பவ இடத்திலேயே பரிதாபமாக உயிரிழந்தார். ஹைதராபாத்தில் ஆட்டோ ஓட்டி வரும் இவரது மகன் துர்கேஷ், தனது கிராமத்தில் சமீபத்தில் நிகழ்ந்த சில மரணங்களுக்குத் தனது தாயின் பில்லி சூனியமே காரணம் எனத் தவறாகச் சந்தேகதித்துள்ளார். இந்த விவகாரம் தொடர்பாகத் தாய்க்கும் மகனுக்கும் இடையே கடந்த சில நாட்களாகவே கடுமையான வாக்குவாதம் நீடித்து வந்துள்ளது.

இவர்களுக்குள் இருந்த கருத்து வேறுபாட்டைத் தீர்த்து, மகனுக்குப் புரிய வைப்பதற்காகக் கடந்த இரண்டு நாட்களுக்கு முன்பு கிராமத்தில் ஒரு பஞ்சாயத்துக் கூட்டமும் நடத்தப்பட்டுள்ளது. எனினும், துர்கேஷின் மனதில் இருந்த ஆதாரமற்ற சந்தேகமும் மூடநம்பிக்கையும் தீரவில்லை. இந்நிலையில், சனிக்கிழமை மாலை கிராமத்திற்குத் திரும்பிய துர்கேஷ், அங்கு அக்கம் பக்கத்தினருடன் பேசிக்கொண்டிருந்த தனது தாயைச் சண்டையிட்டு வீட்டிற்குள் அழைத்துள்ளார். அப்போது அவர்களுக்குள் மீண்டும் வாக்குவாதம் முற்றியதில் ஆத்திரமடைந்த துர்கேஷ், தான் மறைத்து வைத்திருந்த பெட்ரோல் அல்லது டீசலைத் தாய் சாய்வா மீது ஊற்றித் தீ வைத்துள்ளார்.

உடல் முழுவதும் தீ பரவியதால் அலறியடித்த சாய்வா, பலத்த தீக்காயங்களுடன் சம்பவ இடத்திலேயே துடிதுடித்து உயிரிழந்தார். இக்கோரச் சம்பவம் குறித்துத் தகவல் அறிந்த உள்ளூர் காவல்துறையினர் உடனடியாக ஏலுபேட்டா கிராமத்திற்கு விரைந்து வந்து, சாய்வாவின் உடலைக் கைப்பற்றிப் பிரேதப் பரிசோதனைக்காக அனுப்பி வைத்தனர். மேலும், இந்த கொடூரக் கொலையைச் செய்த மகன் துர்கேஷை போலீசார் அதிரடியாகக் கைது செய்து தீவிர விசாரணை மேற்கொண்டு வருகின்றனர். மூடநம்பிக்கையின் காரணமாகப் பெற்ற தாயையே மகன் தீவைத்து எரித்த இச்சம்பவம் மாநிலம் முழுவதும் பெரும் அதிர்ச்சி அலைகளை ஏற்படுத்தியுள்ளது.