“பட்டப்பகலில் கொடூரம்..” அப்பாச்சி பைக்கில் வந்த எமன்கள்.. பிள்ளைகளைப் பள்ளியில் விட்டுவிட்டு திரும்பிய தந்தைக்கு நேர்ந்த கொடூரம்.. நெஞ்சை பதற வைக்கும் பின்னணி..!!

பீகார் மாநிலம் போஜ்பூர் மாவட்டம் அர்ரா நகரில், சனிக்கிழமை காலை அரங்கேறிய ஒரு படுபயங்கரக் கொலைச் சம்பவம் அப்பகுதியின் சட்டம் ஒழுங்கை முழுமையாகச் சீர்குலைத்துள்ளது. 36 வயதான மென்பொருள் தொழிலதிபர் உபேந்திர குமார் சிங், காலையில் தனது குழந்தைகளைப் பள்ளியில் பாதுகாப்பாக விட்டுவிட்டு பைக்கில் வீடு திரும்பிக் கொண்டிருந்தார். அவர் பிஹாரி மில்லில் உள்ள சூர்யா கோவிலுக்கு அருகிலுள்ள பாலத்தின் மீது வந்தபோது, அங்கு ஏற்கனவே பதுங்கியிருந்த முகமூடி அணிந்த மூன்று குற்றவாளிகள் அப்பாச்சி பைக்கில் வந்து அவரை வழிமறித்தனர். அந்தத் துப்பாக்கிதாரிகள் மிக அருகில் இருந்து உபேந்திராவின் தலையில் சுட்டுவிட்டு அங்கிருந்து தப்பியோடினர். ரத்த வெள்ளத்தில் சரிந்த அவரை மீட்டு மருத்துவமனைக்குக் கொண்டு சென்ற போதிலும், அவர் ஏற்கனவே இறந்துவிட்டதாக மருத்துவர்கள் அறிவித்தனர்.

கொல்லப்பட்ட உபேந்திர குமார் சிங் சந்தேஷ் காவல் நிலையப் பகுதிக்குட்பட்ட பரிஹான் கிராமத்தைச் சேர்ந்தவர் ஆவார். தற்போது அவர் நவாடா காவல் நிலையப் பகுதியிலுள்ள கௌதம் புத்தா நகரில் தனது குடும்பத்துடன் வசித்து வந்தார். சுமார் ஒரு வருடத்திற்கு முன்புதான் இவரது தந்தை உடல்நலக்குறைவால் காலமானார். இரண்டு தம்பிகள் மற்றும் ஒரு சகோதரிக்கு மூத்த மகனான உபேந்திரா தான், ஒட்டுமொத்த குடும்பத்தின் நிதிப் பொறுப்பையும் கவனித்து வந்தார். இவரது தம்பி சத்யேந்திர குமார் சிங் இந்திய ராணுவத்தில் பணியாற்றி வருகிறார். தந்தையின் மறைவிலிருந்து மீளாத நிலையில், குடும்பத்தின் தூணாக விளங்கிய மூத்த மகனும் பட்டப்பகலில் சுட்டுக்கொல்லப்பட்ட சம்பவம் அந்தப் பகுதி முழுவதையும் சோகத்தில் ஆழ்த்தியுள்ளது.

இச்சம்பவம் குறித்துத் தகவல் அறிந்ததும் சதர் துணை காவல் கண்காணிப்பாளர்சுஷில் குமார் மற்றும் நவாடா காவல் நிலைய அதிகாரி குமார் ரஜினிகாந்த் ஆகியோர் தங்களது குழுவினருடன் விரைந்து வந்து விசாரணையைத் தொடங்கினர். இந்தத் துணிகரக் கொலைக்கான காரணத்தைக் கண்டறியப் பழைய தனிப்பட்ட விரோதம், தொழில் போட்டி, நிலத்தகராறுகள் மற்றும் நிதிப் பரிவர்த்தனைகள் உள்ளிட்ட பல கோணங்களில் காவல்துறையினர் விசாரணை நடத்தி வருகின்றனர். கொலையாளிகளைப் பிடிக்க நகரத்திலிருந்து வெளியே செல்லும் அனைத்துச் சாலைகளும் மூடப்பட்டுத் தீவிரக் கண்காணிப்பு வளையத்திற்குள் கொண்டு வரப்பட்டுள்ளன. மேலும், குற்றவாளிகள் குறித்த தடயங்களைக் கண்டறியச் சம்பவ இடத்திலும், பிரதான சாலைகளிலும் பொருத்தப்பட்டிருந்த சிசிடிவி (CCTV) கேமராக்களின் காட்சிகளைத் தடயவியல் குழுவினர் மற்றும் போலீசார் தீவிரமாக ஆய்வு செய்து வருகின்றனர்.