FLASH: இரவோடு இரவாக தவெகவில் கூண்டோடு நீக்கம்… அமைச்சர் புஸ்ஸி ஆனந்த் எடுத்த அதிரடி முடிவு..!!

கேரளாவில் போதைப்பொருள் கடத்தல் வழக்கில் தமிழக வெற்றிக் கழகத்தின் நீலகிரி மேற்கு மாவட்ட இணைச் செயலாளர் நசீப் கைது செய்யப்பட்டதைத் தொடர்ந்து, அவர் கட்சியில் இருந்து அதிரடியாக நீக்கப்பட்டுள்ளார். கட்சியின் பொதுச் செயலாளர் புஸ்ஸி ஆனந்த் வெளியிட்டுள்ள அறிக்கையின்படி, கட்சியின் ஒழுங்கு மற்றும் கொள்கைகளுக்கு முரணாகச் செயல்பட்டதால் இந்த நடவடிக்கை எடுக்கப்பட்டுள்ளதாகத் தெரிவிக்கப்பட்டுள்ளது.

நசீப்புடன் சேர்த்து இந்த வழக்கில் தொடர்புடையதாகக் கருதப்படும் தவெகவின் நீலகிரி மாவட்டத் துணைச் செயலாளர் ஸ்ரீஜித் மற்றும் மாவட்டச் செயற்குழு உறுப்பினர் அமீர் அப்பாஸ் ஆகிய இருவருமே தங்களது பொறுப்புகளில் இருந்து விடுவிக்கப்பட்டுள்ளனர். இவர்கள் மூவரும் கட்சியின் அடிப்படை உறுப்பினர் தகுதி உள்ளிட்ட அனைத்துப் பொறுப்புகளில் இருந்தும் முழுமையாக நீக்கப்பட்டு, கட்சியோடு இனி எந்தத் தொடர்பும் இல்லை எனத் தலைமை அறிவித்துள்ளது.

ஏற்கனவே சில நாட்களுக்கு முன்பு நாகப்பட்டினத்தில் சுமார் 135 கிலோ மெத்தபெட்டமைன் போதைப்பொருள் கடத்திய வழக்கில், தவெகவின் நாகை மாவட்டச் செயற்குழு உறுப்பினராக இருந்த பூபாலன் மத்திய வருவாய் புலனாய்வுத் துறையினரால் கைது செய்யப்பட்டது பெரும் பரபரப்பை ஏற்படுத்தியது. அடுத்தடுத்து கட்சியின் முக்கிய நிர்வாகிகள் போதைப்பொருள் வழக்குகளில் சிக்குவதும், அவர்கள் உடனடியாகக் கட்சியை விட்டு நீக்கப்படுவதும் தமிழக அரசியல் வட்டாரத்தில் தற்போதைய முக்கியப் பேசுபொருளாக மாறியுள்ளது.